Pe-i termini che derivan da de forme latiñe in -ismu(m) ò do grego antigo in -ισμός, coscì comme pe produçioin analoghe ciù reçente, s’ottëgne pe commun in zeneise doî exiti poscibili.

• Unna forma zeneise d’exito diretto in -iximo [-ˈiːʒimu], con l’inserçion de unna vocale d’arrembo. Sta forma, pe tradiçion consciderâ popolare, a l’é pe-a ciù parte anæta feua de deuvia inta capitale, ma a l’é ancon addeuviâ inte varie äie deçentræ respetto a-o cappoleugo e inte l’ambito letteräio.
• Unna forma instruia ò seminstruia in -ismo [-ˈizmu].

S’avià donca, pe exempio, pe-o termine italian “meccanismo”, e forme zeneixi mecaniximo [mekaˈniːʒimu] e mecanismo [mekaˈnizmu]. Inte sto diçionäio se repòrta tutte doe e forme, sensa nisciuña preferensa pe uña ò pe l’atra.

In zeneise l’é frequente o passaggio de -[l]- à -[r]- davanti a-e consonante gutturale e labiale: coscì, de poule comme ingleise [iŋˈɡlejze], biçicletta [bisiˈkletˑa] e complicâ [kuŋpliˈkaː] peuan ëse prononçie ascì ingreise [iŋˈɡrejze], biçicretta [bisiˈkretˑa] e compricâ [kuŋpriˈkaː]. Into DEIZE se repòrta tutte doe e grafie, quande en addeuviæ da-i parlanti.

In scê alternanse de prononçia do zeneise d’ancheu scompartie da-a communitæ de locutoî, e in scê seu representaçioin lescicografiche (in parte repiggiæ into DEIZE), s’ammie in particolâ S. Lusito, Aspetti teorici e pratici della redazione di un dizionario genovese-italiano della lingua contemporanea. Metalessicografia di una varietà di koinè, Edizioni dell’Orso, 2025, §6.