Tanti termini che presentan in zeneise o prefisso in- l’an ottegnuo pe mezo de dissimilaçion de unn’antiga consonante doggia. S’attrovià donca inlustrâ < illustrem, inmenso < immensus, inludde < illudere, etc. Di atri lemmi an incangio mantegnuo o prefisso latin, comme pe inscrive < inscribere. Di atri ancon en stæti formæ pe analogia, comme inmanegâ.

Do tutto despægia a l’é incangio a costion pe-i termini comme imagine < imaginem che no an mai avuo ni o prefisso in- ni a consonante doggia, e pe-i quæ scrive in- o no saieiva giustificou. A grafia sbaliâ inmagine, addeuvia de vòtte da çerti scrittoî moderni, a l’é donca unna forma d’ipercorrettiximo basâ in sce l’italian, e a l’é de seguo da no addeuviâ.

Inte sto diçionäio, consciderou e finalitæ pe-o ciù didattiche che l’animan (che pontan ascì a-o repiggio de çerte forme ciù viaxe, se addescian l’interesse de casañe), se repòrta tutte doe e forme quande existan e quand’en etimologicamente giustificæ.