Conseggio pe-o patrimònio linguistico ligure

Conseggio ligure

Materiali in lengua ligure

A megio strategia pe imprende o ligure a l’é quella de bollâse e mettise à leze e sentî di contegnui in lengua. Inte sta seçion emmo arrecuggeito unna serie de materiali conseggiæ pe chi veu imprende: libbri, cansoin, racconti curti e atre informaçioin.

Grammatica

I membri do Conseggio en apreuvo à mette in linia unna verscion revista da sola grammatica scientifica stæta scrita pe-o zeneise: a Grammatica del genovese do F. Toso. Sciaccâ chì pe leze a grammatica in linia.

Pe chi s’avvexiña a-o studio do zeneise pe-a primma vòtta, chì sotta conseggemmo di testi che trattan de grammatica ascì.

Lettue in pròsa

Se propoñe chì unna lista de scriti conseggiæ in pròsa zeneise, che se peuan accattâ segge inte libbraie segge in sce Internet.

  • A-a reversa, colleçion de scriti in pròsa zeneise de Gianfranco Mangini. F.lli Frilli editore, 2009.
  • Abbrettio, pròsa e versci zeneixi de Gianfranco Mangini. F.lli Frilli editore, 2013.
  • A bocca do lô, romanso italian do secolo XIX de Gaspare Invrea, traduto in zeneise da Fiorenzo Toso. De Ferrari, 2018.
  • A-i rastelli de stelle e tutti i atri racconti, romanso de Alessandro Guasoni. De Ferrari, 2019.
  • Lazarillo de Tormes, romanso spagnòllo do secolo XVI, traduto in zeneise da Stefano Lusito. Quærno n. 5 da revista Cabirda, 2020.
  • E ciù belle föe, dozze stöie di fræ Grimm contæ inta lengua da Liguria, à cua de Andrea Acquarone e Anselmo Roveda, traduçioin de Andrea Acquarone, Fabio Canessa, Stefano Lusito, Bruna Pedemonte, Anselmo Roveda, Fiorenzo Toso. De Ferrari, 2019.

Giornali e reviste

  • O cotidian ciù grande da region, Il Secolo XIX, o pubrica tutte e domeneghe unna pagina in zeneise.
  • O Stafî a l’é unna revista solo in zeneise ch’a sciòrte tutti i meixi. A parla de coltua, politica, economia e problemi soçiali.

Stöia da lettiatua

  • Ra Cittara Zeneize. Poesie scelte. Ediçion critica de l’euvia do Gian Giacomo Cavallo (1590-1657), con commento e traduçion italiaña à cua de Fiorenzo Toso. Edizioni dell’Orso, 2021.
  • Poesia in ligure tra Novecento e Duemila, de Alessandro Guasoni. Edizioni Cofine, 2019.
  • La letteratura ligure in genovese e nei dialetti locali. Profilo storico e antologia. Vol I-VII. De Fiorenzo Toso. Le Mani, 2009.