Ne sostëgnan

O Conseggio o l’à inandiou o seu travaggio do 2019 comme gruppo de lou de quattro studioxi liguri pe progetti de natua linguistica. Co-o tempo atre gente an vosciuo dâne o seu arrembo. O l’é un önô poei contâ in sciô sostëgno de:

• Andrea Acquarone. Scrittô, giornalista, analista econòmico. Da-o 2013 o s’òccupa de l’avvardo da lengua zeneise, con l’inandio do collettivo «Che l’inse» (2013-2020), a fondaçion e direçion da revista «O Stafî» (2019-2021) e a cua da pagina in zeneise de «Il Secolo XIX».
• Paolo Besagno. Autô e compoxitô zeneise. O l’á studiou muxica elettrònica co-o meistro Riccardo Dapelo. Da-o 1994 o l’é o direttô artistico da squaddra de canto popolare zeneise «I Giovani Canterini di Sant’Olcese», dove o canta da contræto ascì.
• Lorenzo Bisio. Studioso de stöia de l’arte diplomou à l’universcitæ de Zena, divurgatô pe-i Rolli Days e co-ideatô de vixite in zeneise pe-i palaçi di Ròlli. O scrive in sce varri giornali e reviste da region pe valorizzâ e fâ conosce o patrimònio stòrico e artistico ligure.
• Guido Borghi. Reçercatô à tempo indeterminou in Glottologia e Linguistica à l’universcitæ de Zena. Tra i seu tanti argomenti de studio gh’é a reconstruçion da toponomastica e do lescico indoeuropeo preistòrico, con un euggio particolâ a-o baçî do Mediterraneo.
• Davide Cabona. Sunnou e compoxitô da vallâ do Gròmolo. Appascionou de stöia locale e di parlæ do Tigullio e de seu vallæ.
• Fabio Canessa. Giornalista e autô zeneise ch’o l’à travaggiou pe Primocanale, Telenord e Genova24. O l’é un di promotoî ciù importanti de l’utilizzaçion do zeneise into campo do giornalismo.
• Edoardo Ferrante. Data scientist ch’o travaggia comme innovatô à Zurigo. Diplomou à l’universcitæ de Zena in inzegneria informatica, gh’é cao unî e seu pascioin pe-a programmaçion, intelligensa artifiçiâ e linguistica pe avvardâ a seu lengua.
• Michele «Mike fC» Ferroni. Cantautô e rapper in lengua italiaña e zeneise, esperto de contegnui multimediali, o sperimenta con di format innovativi pe-a valorizzaçion da lengua ligure in tutte e seu variante.
• Enrico Granara. Traduttô e scrittô in zeneise. O l’à misso o seu passou da diplomatico a-o serviçio do Commun e Zena e do MEI pe fâ da ligammo co-o Conseggio.
• Alessandro Guasoni. Poeta, narratô e saggista, o l’à pubricou unna dozzeña de volummi de e in sciô zeneise. O l’à guägno numeroxi premmi letteräi, da-o Lauro d’Oro 1981 a-o Ciavai 2017. O conlabora con l’universcitæ de Innsbruck a-o progetto GEPHRAS.
• Christopher Haberland. Data scientist e dottorando in linguistica computaçionâ à l’universcitæ de Washington.
• Stefano Lusito. Reçercatô into departamento de Romanistica de l’universcitæ de Innsbruck. Traduttô e lescicògrafo, o l’à collaborou a-o progetto GEPHRAS. Diplomou à l’universcitæ de Zena in traduçion e interpretaçion.
• Jean Maillard. Nasciuo à Zena, da-o 2018 o l’é reçercatô inta Silicon Valley in sce l’intelligensa artifiçiâ applicâ a-a linguistica. Diplomou comme dottô de reçerca à l’universcitæ de Cambridge in linguistica computaçionâ.
• Danila Olivieri. Poetessa in lengua italiaña e zeneise ch’a l’à guägno ben ben di premmi. A l’é a prescidentessa do «Salotto letterario» de Sestri Levante e membro da giuria do premio internaçionale Carlo Bo/Giovanni Descalzo.
• Bruna Pedemonte. Poetessa zeneise, a collabora co-a pagina Parlo ciæo do Secolo XIX con unna rubrica de reflescion filosòfica in sciâ soçietæ. A l’à pubricou unna recuggeita de poexie titolâ À crovî e reixe nue pe-a collaña E restan forme (ed. Zona).
• Claudio Rezzoagli. Appascionou di parlæ e de tradiçioin da vallâ de Cichê, dond’o l’é nasciuo. Da anni o se dà d’attorno pe-a valorizzaçion do patrimònio linguistico da Liguria, deuviando ciù che tutto i neuvi mezzi de communicaçion.
• Rosa Ronzitti. Professoa assoçiâ de Glottologia e Linguistica à l’universcitæ de Zena e codirettoa de Lumina. Rivista di linguistica storica e di letteratura comparata. A l’é speçialista de Glottologia, Sanscrito e Mitologia Comparâ.
• Anselmo Roveda. Scrittô e studioso de lettiatua e imaginäio, o l’é professô de Sceneggiatua II (Analixi de struttue narrative e elementi de scrittua creativa) à l’ISIA de Urbin, coordinatô da revista de lettiatua e inlustraçion Andersen e direttô da revista Cabirda.
• Andreiña Soâ. Autoa de ciù libbri de narrativa e de poexia. A l’à guägno di reconoscimenti prestigioxi con poexie e conti in lengua italiaña e zeneise. A conlabora co-o gruppo Parlo Ciæo do Secolo XIX.

O Conseggio o l’é binellou con l’Académie des langues dialectales do Prinçipato de Monego, unn’organizzaçion dedicâ a-o studio, a-a diffuxon e à l’avvardo do monegasco e di atri parlæ liguri. L’Académie, stæta fondâ do 1981 con l’autorizzaçion do governo do Prinçipato e o sostëgno de S.A.S o prinçipe Rainê III, a l’arrecheugge linguisti e studioxi de nòmina internaçionale.