Seminäio «Il genovese: lingua di cultura a-i 14 d’ottobre à Palazzo della Borsa

Mäcordì a-i 14 d’ottobre, à 17, s’attroviemo in tanti a-o Palaçio da Borsa pe-o seminäio «Il genovese: lingua di cultura», un poidisnâ dedicou a-o zeneise comme lengua viva, da-a reçerca a-e arte e a-a tecnologia.

Se parlià de status soçiolinguistico e de grafia, de giornaliximo in zeneise, di palaçi di Ròlli contæ con de stöie disegnæ e de trallalero, con l’exibiçion da-o vivo di Canterini di Sant’Olcese. Se parlià de l’intelligensa artifiçiale appricâ a-a lengua ascì.

Tra i relatoî ghe saià i nòstri membri Poulo Besagno, Fabio Canessa, Steva Lusito e Jean Maillard. Moderià o seminäio Martin Ròcca, membro do Conseggio lê ascì.

O seminäio o l’é organizzou da-a Scheua Supeiô IANUA de l’Universcitæ de Zena, da-o Consorzio IANUA e da ISA IANUA, co-o suppòrto do Conseggio pe-o patrimònio linguistico ligure. À 19:30 ghe saià un aperitivo offerto da Pesto per Amore.

L’incontro o se tegnià inta Sala delle Grida do Palaçio da Borsa, in stradda XX Settembre 44 à Zena. O l’é averto à tutti e o se tëgne in italian. I pòsti en limitæ e l’inscriçion a l’é obrigatöia: chi no se fïse ancon inscrito o peu fâlo pe mezo do formuläio d’inscriçion.

A lengua ligure protagonista de «O viægio linguistico de Lara in Italia», a guidda didattica do Conseggio d’Euröpa

A lengua ligure ascì a l’é protagonista de O viægio linguistico de Lara in Italia, unna neuva guidda didattica dedicâ a-e scheue italiañe e europee e pubricâ da-o Çentro europeo pe-e lengue moderne (ECML) do Conseggio d’Euröpa in occaxon da Giornâ europea de lengue.

A guidda a contëgne unna curta presentaçion de tutte e lengue parlæ in Italia, co-e esprescioin ciù commun, i numeri da un à dexe e un còdiçe QR ch’o pòrta a-e registraçioin co-a prononçia de tutte e poule. O ligure o l’é presentou comme «a lengua de Combo e de l’impëio marittimo de Zena» che ancon oua «o l’arresta un importante elemento identitäio regionale».

A guidda a fa conosce a-i studenti a ricchessa do patrimònio linguistico d’Italia e a l’invita à anâ a-o de là de l’idea de l’Italia comme paise donde se parla unna lengua solo, arregordando che primma do 1861 ciù do 95% di italien o no parlava l’italian inta vitta cotidiaña. A diffuxon da lengua naçionale into secolo XX a l’à de spesso comportou l’emarginaçion de lengue regionale, l’uso de quæ o l’ea de spesso descoraggio e punio inte scheue.

A pubricaçion a l’ascciæisce che e coscì dite «lengue regionale» en stæte acciammæ «dialetti» in mainea sbaliâ, mentre en de lengue à pin titolo, con unna grammatica, stöia e tradiçion letteräia e reconosciue da di còdiçi internaçionali comme l’ISO 639-3. Ste lengue, ancon parlæ da di mioin de çitten, constituiscian un patrimònio colturale da avvardâ.

O viægio linguistico de Lara in Italia o l’é disponibile de badda (pe-o momento in ingleise) in sciâ pagina do progetto e in formato PDF.

O progetto o l’é stæto realizzou in conlaboraçion co-o CLIRD (Coordinamento Lingue Regionali e Diritti linguistici) e graçie a-o suppòrto speçialistico de assoçiaçioin che ô compoñan pe-e eutto lengue regionale de competensa (emilian, ligure, lombardo, napolitan, piemonteise, romagnòllo, siçilian e veneto), tra e quæ o Conseggio pe-o patrimònio linguistico ligure.

«L’é unna grande satisfaçion vedde valorizzou o nòstro patrimònio linguistico inte unn’iniçiativa do Conseggio d’Euröpa. Comme Conseggio pe-o patrimònio linguistico ligure, semmo contenti d’avei contribuio à sto progetto, ch’o l’òffre a-i ciù zoveni l’occaxon de conosce a ricchessa linguistica da Liguria e de l’Italia», o commenta o Jean Maillard, prescidente do Conseggio pe-o patrimònio linguistico ligure.

«Quella de “lengua ligure” a l’é unna denominaçion adottâ à livello internaçionale pe indicâ l’insemme de varietæ romanse parlæ in Liguria ò, pe ëse ciù preçixi, e varietæ romanse che i linguisti includdan into gruppo ligure in sciâ base de determinæ critëi – ascciæisce o Stefano Lusito, reçercatô in linguistica e membro do Conseggio –. À sta famiggia appartëgne defæti anche de varietæ parlæ feua di confin regionali, comme o monegasco ò o bonifaçin. Dito questo, a varietæ de referensa, quande se parla de “ligure”, a l’é squæxi delongo o zeneise, quella ciù spantegâ e ascì quella caratterizzâ da-o ciù grande prestigio stòrico».

Iniçiative scientifiche in sciô ligure a-o 1º d’ottobre 2026

A-o 1º d’ottobre ghe saià, à Zena e à Dossaiga respettivamente, doe iniçiative scientifiche co-a parteçipaçion do nòstro sòçio Stefano Lusito, a-o momento titolare de unna borsa de reçerca à l’universcitæ de Zena.

A primma iniçiativa a l’é a presentaçion titolâ «Denominazioni della fauna marina fra Liguria e Provenza: il caso del monegasco», ch’a se tegnià à 11.15 h durante o seminäio «La terminologia del mare e degli oceani», à l’universcitæ de Zena (stradda Balbi 4). O seminäio o l’é parte de attivitæ do çentro interdipartimentale Ce.R.Te.M. (Centro di Ricerca in Terminologia Multilingue).

De poidisnâ, à 17.30 h, o Lusito o l’intervegnià incangio a-o seminäio de linguistica «Otto parole per quante lingue? | Huit mots pour combien des langues ?», ch’o se tegnià inta salla do Conseggio communale de Dossaiga (stradda Romma 50). L’incontro, organizzou into contesto do progetto «MoPa – Parole di passaggio» e finançiou da-o programma de cooperaçion interregionale VI-A Fransa-Italia Alcotra 2021-2027, o saià dedicou a-e caratteristiche linguistiche da zöna de tranxiçion tra Liguria e Provensa. A-o seminäio intervegnià, insemme a-o Stefano Lusito, o Lorenzo Filipponio (universcitæ de Zena) e o Philippe Del Giudice (universcitæ de Nissa).

O primmo protòtipo de tastea ligure

Dòppo tanti esperimenti preliminari, i membri do Conseggio an produto o primmo protòtipo fixico de tastea ligure.

A l’é a primma tastea pensâ pe permette de scrive i caratteri neçessäi pe tutte e varietæ ligure, compreiso i açenti verticali addeuviæ into monegasco. A dispoxiçion a tëgne conto da frequensa co-a quæ s’addeuvia i differenti caratteri, pe rende ciù façile a scrittua.

A fase de sperimentaçion a l’anià avanti ancon pe quarche meise, con l’obiettivo de produe di atri protòtipi fixichi do 2027. Chi fïse interessou à parteçipâ a-a sperimentaçion o peu scrivine à l’adresso [email protected].

L’Antologia a passa i 150 autoî

A nòstra Antologia da lettiatua ligure à cua do Lusciandro Guason a continua à cresce: i autoî representæ en za ciù de 150, da-i prinçippi a-a giornâ d’ancheu.

Da-i versci de l’Anònimo zeneise e do Poulo Foggetta fin a-a poexia do Fiorenso Toso e a-i autoî contemporanei, l’accuggeita a l’attraversa di secoli de lettiatua ligure. E presentaçioin accompagnan a lettua di testi e aggiuttan à conosce i autoî e o contesto donde e seu euvie en nasciue. Tutti i tòcchi en accompagnæ da-a seu traduçion italiaña. Un numero delongo ciù erto de testi o l’é disponibile in verscion audio ascì, co-e lettue di autoî mæximi quande poscibile.

Un invito à descrovî de neuve voxe e à attrovâ torna quelle ciù ammæ.