In zeneise e poule a quæ base latiña a termina in -ōria peuan presentâ a prononçia -[wiː]- (ciù tipicamente urbaña, ma ben ben spantegâ o mæximo inte äie ciù influensæ da-o modello metropolitan) ò -[uj]- (tipica de äie ciù ò meno deçentræ respetto a-o cappoleugo, ma ascì ben ben spantegâ). Coscì, de poule comme poia [ˈpwiːa] ~ [ˈpujˑa], spassoia [spaˈswiːa] ~ [spaˈsujˑa], sarmoia [sarˈmwiːa] ~ [sarˈmujˑa] e tesoie [teˈzwiːe] ~ [teˈzuiˑe] vëgnan chì marcæ co-e doe prononçie, tutte doe in deuvia e corrette. A grafia do zeneise a permette de scrive de poule pæge sensa privilegiâ unna variante de prononçia respetto à unn’atra.

In scê alternanse de prononçia do zeneise d’ancheu scompartie da-a communitæ de locutoî, e in scê seu representaçioin lescicografiche (in parte repiggiæ into DEIZE), s’ammie in particolâ S. Lusito, Aspetti teorici e pratici della redazione di un dizionario genovese-italiano della lingua contemporanea. Metalessicografia di una varietà di koinè, Edizioni dell’Orso, 2025, §6.