I sostantivi e i aggettivi feminin che terminan in -e restan invariæ a-o plurale, e mantëgnan unna forma ciù vexiña à quella da declinaçion originäia latiña respetto a-i equivalenti italien. S’avià donca unna ciave > doe ciave < duae claves e unna noxe > træ noxe < tres nuces. E forme di plurali in -i, comme ciavi e noxi, en di italianiximi ben ben spantegæ, mascime inte äie urbañe. Fan ecceçion i feminin in -eise, a quæ forma plurale a l’é da tempo in -eixi comme pe-o mascolin: unna zeneise > dötræ zeneixi.

In zeneise tante poule formæ, pe etimologia, co-i prefisci latin con- e in- (che seggian d’origine diretta ò nasciue in zeneise pe analogia con ste urtime) peuan mantegnî a consonante nasale do prefisso ò donca ascimilâla a-a consonante apreuvo. Pe sta raxon l’existe de cobbie de termini comme construe ~ costrue, inluminâ ~ illuminâ ò inmanegâ ~ immanegâ. Tutte doe e forme en in deuvia e valide pægio.

A mæxima a vâ ascì pe-e cobbie de termini comme inludde ~ illudde, inmenso ~ immenso ò inlustrâ ~ illustrâ, donde a scillaba iniçiale in- a no l’é etimològica, ma a l’é dovua a-a discimilaçion do ligammo iniçiale.