A desinensa atona -eo a realizza un son ch’o peu cangiâ, à segonda di caxi, tra [ɔw] ~ [ju] ~ [ew]. Pe de raxoin de coerensa se conscidera opportun mantegnîla, coscì comme fan tanti autoî, pe quelli termini che l’aivan in origine e che an ancon o plurale in -ei. Da angeo [ˈaŋdʒɔw] se formià donca angei [ˈaŋdʒej], da umeo [ˈymˑju] s’avià umei [ˈymˑej] ~ [ˈymˑi], etc.

O nesso [nj] a-o comenso de poule e tra vocale o vëgne de spesso realizzou in zeneise urban e varietæ affin comme [ɲ] (o son de “gn”). S’avià donca a prononçia [ˈɲaːtri] pe niatri (“gnatri”), [iɲeˈsjuŋ] pe inieçion (“igneçion”), [ˈaɲˑa] pe ania (“agna”), ecc. Se nòtte che i mascolin scingolari che terminan in -nio [-ɲˑu] a-o plurale terminan regolarmente in -nni [-nˑi]: testimònio [testiˈmɔɲˑu] > testimònni [testiˈmɔnˑi], capitanio [kapiˈtaɲˑu] > capitanni [kapiˈtanˑi], etc.