I compòsti de uña mantëgnan a forma femeniña quande an fonçion pronominale. Pe exempio, in contâ di oggetti de genere femenin comme e carte da zeugo, se dià uña, doe, træ, …, vinti, vintuña, etc.

Incangio, e forme aggettivale en pe-o sòlito pæge à quelle mascoliñe. Se dià donca gh’ò vintun carte; forme comme gh’ò vintuña carte en pöco frequente.

I numerali ordinali se decliñan comme aggettivi regolari. S’avià donca:

• pe-e forme in -o: o primmo, a primma, i primmi, e primme;
• pe-e forme in -en: o sezzen, a sezzeña, i sezzen, e sezzeñe.

Pe-i ordinali ciù in là do 9ⁿ, l’existe segge e forme in -en segge quelle in -eximo.

E forme in -en (dëxen, unzen, etc.) en quelle do zeneise ciù viaxo. Quelle in -eximo (deximo, unzeximo, etc.) en refæte in sciô latin, e en delongo ciù in deuvia pe caxon de l’influensa de l’italian ch’o l’à de forme pæge. A-a giornâ d’ancheu se peu arrivâ fiña à sentî di cardinali de formaçion italiaña sccetta, comme undiceximo.

E forme ordinale ciù in là da 19ª no en guæi frequente into zeneise parlou, mascime pe quelle in -en che – sciben che son quelle de formaçion regolare – en feua de deuvia da tempo. Comme se peu leze inta pròscima nòtta, a-o seu pòsto s’addeuvia de spesso e forme cardinale.

Incangio de forme propiamente ordinale l’é frequente, mascime pe-i numerali ciù erti, a deuvia de forme cardinale inte çerti contesti. Se porrià attrovâ donca o giorno vinti da mæ vixita ciufito che o vinten giorno; l’ediçion trenteçinque da regatta ciufito che a trenteçinqueña ediçion da regatta, etc.

A forma citto  a s’addeuvia pe indicâ:

• a çentexima parte de chesesæ unitæ monetäia (un cafè o costa un euro e dexe citti);
• o çentimetro, a çentexima parte do metro (un päfæro de doî metri pe trenta citti de diametro).

I collettivi in -ña forman o plurale regolare in -ñe.

E forme çentanâ e miggiâ, mascoliñe a-o scingolare, en femeniñe inte forme plurale regolare çentanæa  e miggiæa  respettivamente. En diffuse ascì e forme çentanæe e miggiæe.