À Stefano Lusito o primmo premio «Tullio De Mauro» 2026 pe-a saggistica

O nòstro membro Stefano Lusito o l’à reçevuo o primmo premio inta seçion «Saggi» do Premio «Tullio De Mauro», assegnou inta XIV ediçion do concorso naçionale «Salva la tua lingua locale» (2026), unn’iniçiativa dedicâ à l’avvardo, a-o studio e a-a valorizzaçion do patrimònio linguistico italian.

O premio o l’é stæto assegnou a-a monografia Aspetti teorici e pratici della redazione di un dizionario genovese-italiano della lingua contemporanea: metalessicografia di una varietà romanza di koinè (Alessandria, Edizioni dell’Orso, 2025). O volumme o l’affronta i problemi da descriçion lescicografica do zeneise contemporaneo tanto in sciô cian da teoria comme in sce quello da prattica, proponendo un metodo pe realizzâ un diçionäio zeneise-italian ligou a-o lescico generale. Unn’attençion particolare a l’é dedicâ a-a conçeçion do zeneise comme varietæ de koinè, con unna diffuxon ch’a va de là di confin de Zena, e a-e costioin da seleçion e do trattamento do lescico, de l’organizzaçion de voxe e de risorse linguistiche neçessäie pe realizzâ o diçionäio. In azzonta a-e costioin teòriche e metodològiche da lescicografia, o studio o l’é dedicou à approfondî de caratteristiche fonetiche e morfologiche osservæ inte l’uso di parlanti e ancon pöco studiæ, e o contribuisce à unna megio conoscensa e documentaçion de sta varietæ romansa.

O Premio «Tullio De Mauro», dedicou a-a memöia do linguista italian, o representa a componente scientifica do concorso naçionale «Salva la tua lingua locale» e o comprende træ seçioin, reservæ respettivamente a-i diçionäi, a-i saggi e a-e texi de laurea. A valutaçion di travaggi a l’é confiâ à unna giuria de studioxi de linguistica e dialettologia. O prescidente o l’é Salvatore Trovato; ne fan parte ascì Mari D’Agostino, Cristina Lavinio, Luca Lorenzetti e Giovanni Ruffino, quest’urtimo academico da Crusca.

O libbro o l’é nasciuo da-a texi de dottorato presentâ da-o Lusito do 2024 à l’universcitæ d’Innsbruck, sotta a-a direçion di professoî Christine Konecny e Paul Danler. A mæxima texi, do 2025, a l’aveiva za ottegnuo l’«Hypo Tirol Bank Dissertationspreis», un premio destinou a-i travaggi de dottorato de particolare qualitæ scientifica.

Sto neuvo premio o s’azzonze coscì à quello ottegnuo in Austria e o fa parte d’un percorso de reçerca che o comprende pubricaçioin scientifiche, volummi cuæ, ediçioin de testi e parteçipaçioin à progetti universcitäi, con unn’attençion particolare a-a dialettologia ligure, a-a lescicografia romansa e a-a documentaçion linguistica do zeneise e do monegasco.