Antònio Duasso (sec. XVIII)

Inte sto dialogo, fòscia no destinou à ëse misso in scena e stæto attribuio a-o Antònio Duasso, doî fræ, i patriçi Aleamme e Benardo Pravexin, che son stæti accaxonæ de vari reati dòppo da cheita da Repubrica aristocratica, se retreuvan inta salla do Conseggetto da inverno, stæta scangiâ in prexon pe-i aristocratichi. O Bernardo o no l’à desmisso afæto e mainee prepotente de quande o l’ea a-o Goerno e o pretendieiva d’ëse obbedio comme unna vòtta, tanto che o Aleamme, za Duxe da Repubrica, ch’o vëgne presentou comme un succubo do Benardo, o no l’arriësce à fâghe accapî che i tempi son scangiæ.

Dialogo successo ne a sala dro Conseggetto da inverno l’anno 1797

Allerame

…e chi poeiva mai contraddîve? Ȏ sei pù che se ve dixeiva quarcösa, ve favi vegnî rosso comme un biscion – e l’é quando voreivi sostegnî unna causa persa – e pretendeivi d’avei a sciensa infusa, de savei tutte re lezi à memöia, e mi, che no voreivo rattellâ e che non aveivo ste qualitæ, ò sempre ceduo, creddendove un sapienton… ma aora tocco con man, cao Bernardo, ma tardi, che eri un c… comme mi.

Bernardo

Oh, a-o passao non gh’é rimedio! L’é inutile de fâ tra noî doî de ste questioin; me fasso dâ ra penna e o caramâ da l’inspettô, e vedrei se saverò ancora mette insemme quarcösa de bon pe sarvâ almeno da l’òdio da naçion.

Allerame

E còsa pretenderesci de fâ? Avvertî, vei, che mi non veuggio ëse imbarassou inti vòstri pastissi; se semmo dæti do ridicolo tanto che basta!

Bernardo

Donque anche voî v’unî à tutti i atri de dentro e de feura contro de mi? Ghe mancava anche questa, à tutte e mæ desgraçie! Sei un fræ veramente ingrato; bella recompensa me dæ per avei fæto de tutto per fâve diventâ Duxe!

Allerame

Tra voî e Baciccia m’ei rovinao tanto che basta, e mi n’ò abbastansa di vòstri intrighi… ma spiegæve un pö, còsa intendei de fâ con questa vòstra petiçion?

Bernardo

Ninte atro che provâ a-o Governo che mi son sempre stæto de genio franseise, e coscì schivâ a tascia che m’an impòsto, e fâse liberâ de chì drento.

Allerame

Oh, oh, oh, me faresci rie sensa aveine veuggia! Voî pretendei de dâ ad intende questa böxia coscì gròssa à Zena, che ve conosce coscì ben? Mæ parei, a session tròppo longa che emmo fæto chì drento a v’à fæto vortâ e çervelle! E no sei che è ciù façile à mi de dâ ad intende à voî che l’é sguao un ase, che voî persuadde o Governo de sta böxia?

Bernardo

Ma non sei che gh’ò unna preuva çerta e segura dro mæ genio pe i franseixi, e che chì in questa sala gh’ò doî testimòni che me faran o piaxei de attestâlo.

Allerame

E chi eian questi doî balloin comme voî, che veuggian espoñise à fâse odiâ sempre ciù da tutti, assegurando unna böxia coscì manifesta?

Bernardo

Disnan tutti doî con noî e non î conoscei? Lagomarsin e Cerònio! Vedrei, vedrei, sciô Allerame, che preuve an da ëse queste! Sentî, mi gh’ò studiao tutta ra neutte, e spero de fâ unna giustificaçion sensa repriche. Vaddo à scrive a petiçion e pòi ve â farò leze; spero che v’unirei con mi ancon per questa vòtta. Ehi, sciô Inspettô, sciô Inspettô!

Inspettô

Cöse vorei, çittadin Bernardo, con tanta sprescia?

Bernardo

Voreivo ro caramâ e a penna per scrive unna petiçion.

Inspettô

Aggiæ paçiensa, Bernardo, ma aora se ne serve un atro. Comme o l’averà finio ve ô darò à voî.

Bernardo

Beniscimo. (passeggia brontolando con la marsina corta, berrettino in testa, il tutto sporco di tabacco di Spagna)

Inspettô

Piggiæ, çittadin Bernardo, chì gh’é o caramâ e ra penna; a carta ghe l’ei?

Bernardo

Sciô Inspettô, mi ô ringraçio da carta: gh’ò a carta bollâ. (scrive)

Ceronio

Tommaxo, dî un pö, cösa o scrive stamattin coscì de bon’oa, Bernardo Pravexin?

Tommaxo

Mi non ve ne sò dî ninte; o machina tutto o giorno per buzzarâ o pròscimo, mi me ne creddo. O l’à sempre fæto coscì, za ti ô sæ; ma porrieiva dâse che o fasse quarche petiçion pe-a tascia.

Ceronio

In graçia de quei birbi lì, noiatri semmo chì drento, e quello pöveo diao de Foppian ascì. Basta, paçiensa: a nòstra innoçensa un giorno a saiâ conosciua.

Bernardo

(ha finito di scrivere e si avvia frettoloso col foglio in mano cercando per la sala con le braccia larghe il fratello, e dice) Sciô Alerame. sciô Alerame, vegnî chì, vegnî, lezei, guardæ se son ancon un òmmo da porei fâ un o con unna canna!

Allerame

(legge attentamente e poi dice) Bravo Bernardo, bravo, non creddeivo mai ciù che arrivesci à tanto! Questa a l’é unna preuva indubitata. Ma… sei pòi seguro che quelli doî che nominæ ve veuggian fâ o piaxei d’accusâse lô per sarvâve voî? Mi me â stento à credde.

Bernardo

A veritæ a ri deve stimolâ, e poi non son tanto avvertii do zughetto che mi ghe fasso; basta che se salvemmo noî, pòi ri atri che ghe pensan: Cerònio poære o l’é un bon òmmo, e Lagomarsin pe fâme piaxei o fareiva de tutto. Ȃ pòrto à l’Inspettô. Ehi, sciô Inspettô, sciô Inspettô!

Inspettô

(piano) Che seccata! (forte) Cösa vorei, çittadin Bernardo?

Bernardo

Beseugna fâme ro piaxei de dâ per mi questa petiçion à ro governo provvisòrio.

Inspettô

Ma cösa a riguarda?

Bernardo

Sciâ leze e sciâ vedrà (prende tabacco)

Inspettô

(legge. Intanto Ceronio figlio osserva per di dietro il contenuto, e vedendovi inserito il nome del padre, prorompe in condogli)

Ceronio figlio

Cös’æla sta baronata? Cösa gh’intra inta petiçion de Bernardo o nomme de mæ poære?

Inspettô

(dà la petizione a Ceronio e dice) Lezei, mostræla à vòstro poære e dîme se o l’é contento che â mande a-o sò destin!

Bernardo

Ò contento ò no contento, veuggio che â se dagghe.

Inspettô

Me maraveggio ben de voî, Bernardo, che parlæ con tanta impertinensa: me parereiva che questo o non fosse ciù o leugo de dî veuggio e non veuggio: chì aora ghe son mi, destinao da-o governo comme Inspettô per sentî quello che occore, e sensa o consenso de quelli che ei inserio in quello papê, non ô manderò mai a-o sò destin. Ei capio, çittadin Bernardo?

Ceronio figlio

O l’é pe atro un bello ardimento questo chì, de pretende de sgravâse lê con aggravâ d’unna suppòsta delinquensa ri atri. Se voî ei ciammao mæ poære quando eri a-o Magistrato dri Inquisitoî, no l’ei ciammao comme Bernardo, ma comme un dro Magistrato per eseguî i òrdini che v’aveivan dæto, e coscì me pâ che non agge da fâ ninte Lucco con Pelucco, e che porrei risparmiâ de rendive ciù ridicolo, zacché tutti i attestati dro mondo non ve giustificheran mai in faccia dra naçion, che ei assascinao per tanto tempo e che a v’à conosciuo sempre per unn’anima neigra.

Lagomarsin

E mì cösa gh’intro in quest’affare, sciô Bernardo? Mæ parei scià se veu servî dre mæ spalle per covercio! Eh, non semmo ciù in quelli tempi, no; aora e cöse se veddan per o sò verso!

Bernardo

Mæ caro sciô Tommaxo, sciâ sa pu che ghe n’ò parlao primma, e che scià m’à dito che scià no gh’à in conträio! De raxon semmo amixi da tanto tempo…

Lagomarsin

Non tanta amiciçia, non tanta amiciçia: à bon conto, se non stava attento Cerònio, con a sò amiciçia scià me bugattava ben; ansi veuggio spartîme da loro signori prepotenti: veuggio disnâ da mi.

Ceronio

Anche mi disnerò solo con mæ figgio. Ehi, Nicòla, manda à dî à Steva Valle che o me mande o disnâ da parte, perché a-o manco no spendemmo i nòstri dinæ sensa savei cösa se mangia: Bernardo e Liame, basta che se contentan lô, ri atri î consideran comme scarpe vege.

Bernardo

Donque, sciô Inspettô, scià me dagghe a mæ petiçion che â farò dâ da un atro. (riprende la petizione e Ceronio gliela strappa dalle mani e la fa a pezzi)

Ceronio figlio

Non â farei dâ ninte da un atro, Bernardo, perché se avrei tanta faccia da fâla dâ sensa o nòstro consenso ne metterò insemme uña mi, che ve depenzerà per quello che sei.

Inspettô

Finimmo questa bæga. Stæ seguri che o no â darà, e quando mai o trovasse o mezo, non dubitæ che o l’é conosciuo tanto che basta. E voî çittadin Bernardo, invece de accrescive di nemixi de ciù, studiæ à giustificâ in atra manea a vòstra conduta che non quella d’aggravâ persoñe che meritan da voî tutti i riguardi, zacché tanto e tanto in questo mòddo non arriverei mai à persuadde nisciun, perché tutti san i miracoli dra vòstra vitta e re belle açioin da vòstra famiggia, che a l’à savuo meritâ tanto ben da-a naçion, che sei diventæ l’òdio universale. (apre la porta e parte)