I pronommi zeneixi

Pronommi personali tònichi

I pronommi personali en e parte do descorso che denòttan e persoñe grammaticale. In zeneise se peuan spartî inte pronommi personali tònichi, di quæ se parlià inte sta seçion, e pronommi personali clitichi.

I pronommi personali tònichi zeneixi en:

Persoña	Numero	Mascolin	Femenin
1ª	scing.	mi
2ª	scing.	ti
3ª	scing.	lê
1ª	plur.	niatri  ~ , noiatri, noî  raro	niatre, noiatre, noî  raro
2ª	plur.	viatri , voiatri, voî  raro	viatre, voiatre, voî  raro
3ª	plur.	liatri, loiatri, lô	liatre, loiatre, lô

Pe-a ciù parte di caxi, no gh’é obrigaçion d’addeuviâ i pronommi personali tònichi quande an fonçion de soggetto: e informaçioin in sciâ persoña grammaticale en za dæte da de atre parte do descorso comme, pe exempio, e forme coniugæ di verbi.

I pronommi personali tònichi s’addeuvian però pe quelli caxi donde l’enfaxi in sciô soggetto a l’é importante, ò quande o soggetto o l’é dislocou.

Forme de cortexia

I pronommi personali tònichi an ascì de forme de cortexia, addeuviæ pe mostrâ respetto e deferensa inti confronti de un interlocutô.

• A forma voscià  [vuˈʃa] a s’addeuvia tra persoñe da mæxima condiçion soçiale, ò da persoñe de condiçion ciù bassa verso persoñe de condiçion ciù erta: a prescidente a m’à dito ch’a ghe saià… e voscià?
• A forma voî  [ˈvwiː], tipica pe tempi de zöne rurale, a peu ëse tegnua ancheu pe distante ò fiña offensciva. A sottolinia o fæto d’avei negou o voscià à unna persoña, e a peu doncâ revelâ unna convinçion de superioritæ inti confronti de l’interlocutô: òu, voî, no poei miga intrâ into tiatro vestio à sta mainea!
• Se peu sentî addeuviâ ascì a forma lê, refæta in sce l’italian lei.

Forme reflescive

À differensa de atre lengue romanse, i pronommi personali de tersa persoña no cangian quand’en addeuviæ reflescivamente ò reçiprocamente. S’avià donca lê pe-o scingolare e liatri ò e seu variante pe-o plurale: a l’à fæto da pe lê, parlavan fra de liatri.

Pronommi personali clitichi

A segonda classe de pronommi personali zeneixi a l’é quella di pronommi clitichi (diti ascì «atoni»), che s’arremban in sce unn’atra poula pe l’açento tònico. En spartii à seu vòtta inte doe meñe: i pronommi clitichi soggetto e i pronommi clitichi oggetto.

Fonçion de soggetto

Comme s’é za visto inta scheda in scî verbi, unna particolaritæ do zeneise o l’é l’òbrigo d’addeuviâ i pronommi clitichi soggetto primma da segonda e da tersa persoña scingolare di verbi.

Persoña	Numero	Mascolin	Femenin
2ª	scing.	ti , t’
3ª	scing.	o , o l’	a , a l’

Davanti a-e forme verbale da segonda persoña scingolare s’addeuvia delongo o pronomme ti. Quande o verbo o comensa pe vocale, s’addeuvia a forma t’, pe elixon.

Exempio	Errô
quande t’arrivi, ciammime	quande arrivi, ciammime
ti canti pròpio ben, ti!	canti pròpio ben, ti!
ti ô veddi ti ascì?	ô veddi ti ascì?

Davanti a-e forme verbale da tersa persoña scingolare, s’addeuvia o pronomme a pe-o femenin e o pe-o mascolin (st’urtimo ascì quande o genere grammaticale o no l’é ciæo ò relevante). Quande o verbo o comensa pe vocale, tra o pronomme e o verbo s’azzonze ascì a particola eufònica l’.

Exempio	Errô
a professoa a ven doman	a professoa vëgne doman
mæ barba o l’é anæto in Fransa	mæ barba é anæto in Fransa
e teu seu cös’a ne pensa?	e teu seu cöse ne pensa?

Fonçion d’oggetto

Quande o pronomme clitico o l’é accusativo (fonçion de complemento oggetto) ò dativo (fonçion de complemento de termine), e ascì pe-i verbi pronominali, e forme en quelle chì dabasso.

Persoña	Numero	Caxo	Mascolin	Femenin
1ª	scing.	acc./dat.	me
2ª	scing.	acc./dat.	te
3ª	scing.	acc.	ô, l’	â , l’
3ª	scing.	dat.	ghe
1ª	plur.	acc./dat.	ne
2ª	plur.	acc./dat.	ve
3ª	plur.	acc.	î	ê
3ª	plur.	dat.	ghe

E forme accusative da tersa persoña scingolare e plurale se decliñan in base a-o genere. In azzonta, pe-e forme scingolare, s’addeuvia a forma l’ quande o pronomme o ven primma de un verbo ch’o comensa pe vocale: ghe ô pòrto mi, ghe l’accatto mi.

Forme reflescive

I pronommi personali clitichi in fonçion reflesciva e reçiproca son:

Persoña	Numero	Mascolin	Femenin
1ª	scing.	me
2ª	scing.	te
3ª	scing.	se
1ª	plur.	se
2ª	plur.	ve
3ª	plur.	se

Forme enclitiche

Pe-a ciù parte di caxi, i pronommi personali clitichi in fonçion d’oggetto en missi primma do verbo, comme quelli in fonçion de soggetto. Quande però o verbo o l’é à l’imperativo, a-o gerundio ò a l’infinio, i pronommi personali clitichi in fonçion d’oggetto ghe van apreuvo, in forma enclitica. Se peu formâ ascì de combinaçioin de ciù de un pronomme.

E forme en pæge à quelle za viste de d’ato, feua che pe-i pronommi accusativi, che piggian e forme -o, -a, -i, -e, ò e variante ciù frequente -lo, -la, -li, -le.

Pronommi e aggettivi possescivi

I pronommi e i aggettivi possescivi indican a persoña ch’a possede l’entitæ a-a quæ fan referensa. I pronommi possescivi an a mæxima forma di aggettivi, ma vëgnan apreuvo à l’articolo determinativo.

Pe-e forme da primma e da segonda persoña plurale, i pronommi e i aggettivi possescivi se decliñan segondo o genere e o numero do possessô: e vòstre ciave, sto vin o l’é o nòstro.

Pronommi e aggettivi demostrativi

I aggettivi demostrativi fan referensa à unn’entitæ e speçifican a seu poxiçion into spaçio, o tempo ò drento do descorso. I demostrativi de proscimitæ s’addeuvian pe-e entitæ vexiñe a-o locutô, quelli de distansa pe-e entitæ lontañe da-o locutô.

Forma	Poxiçion	Aggettivo
masc. sing.	proscimitæ	sto, questo  raro
		distansa	quello
fem. sing.	proscimitæ	sta , questa raro
		distansa	quella
masc. pl.	proscimitæ	sti, questi raro
		distansa	quelli
fem. pl.	proscimitæ	ste, queste raro
		distansa	quelle

E forme de l’aggettivo de proscimitæ questo, questa, etc. en addeuviæ ciù de ræo in zeneise che sto, sta, etc.

Pe enfatizzâ a poxiçion de l’entitæ, a-i agggettivi demostrativi de proscimitæ se ghe peu azzonze l’avverbio chì  (mettilo inte sta cantia chì); à quelli de distansa, se ghe peu azzonze i avverbi lì  ò là  (pòrzime quello libbro là).

I pronommi demostrativi, de mainea analoga, piggian o pòsto de un nomme e ô representan in base a-a seu poxiçion. E forme en pæge à quelle di aggettivi, feua che e forme sto, sta, etc. che in fonçion pronominale en delongo accompagnæ da l’avverbio chì: o mæ o l’é sto chì.

Forma	Poxiçion	Pronomme
masc. sing.	proscimitæ	sto chì, questo  raro
		distansa	quello
fem. sing.	proscimitæ	sta chì, questa raro
		distansa	quella
masc. pl.	proscimitæ	sti chì, questi raro
		distansa	quelli
fem. pl.	proscimitæ	ste chì, queste raro
		distansa	quelle

Bibliografia

F. Toso, Grammatica del genovese: varietà urbana e di koinè, Le Mani, 1997.

A. Guasoni, F. Toso, Il Genovese in tasca. Guida di conversazione, Assimil, 2010.

A. Acquarone, Parlo Ciæo. La lingua della Liguria. Grammatica, letteratura, storia, tradizioni, De Ferrari, 2015.