Gian Giacomo Cavallo (1590–1658)

O Gian Giacomo Cavallo o l’é tegnuo pe-o ciù grande poeta in zeneise de tutti i tempi; nasciuo verso a fin do secolo sezzen e mòrto do 1658, o ne se presenta con tutte e virtù e con tutti i mendi de l’etæ do baròcco. O no saià un caxo se o mascimo sprandô da poexia in ligure o vëgne toccou co-o conçettiximo, che in italian – a-o conträio – o l’à posciuo dâ vitta soo che a-e contorscioin fatte e lambiccæ do G.B. Marino e di seu scoläi. Maniman a lengua ligure, mai tanto concreta pe seu natua, a vëgne à taggio ciù che l’italian pe esprimme i conçetti ciù astræti e ciù sottî, in deuviâ e poule de tutti i giorni e ottegnî coscì, pe contrasto e curtoçircuito, a poexia; o mæximo o l’é stæto dito de l’ingleise de Shakespeare e de John Donne, di quæ e metafore e e raxoin ardie – segondo çertidun – saieivan astrunnæ a-o de feua da seu lengua de nascion.

O baròcco o nasce insemme co-e primme grende crixi do mondo moderno; o pensceo de Pascal e de Cartexo, a Reforma e a Contrareforma semeñan dubiansa inte l’òmmo de alantô, chi comensa à ëse besiggiou da-a farta do senso da vitta. E o Cavallo o ne parla pròpio de sta anscëtæ mai tanto moderna, sotta a finçion da poexia petrarchesca de peñe d’amô, int’unna fuxon perfetta tra forma e sentimento, donde a pascion amosa a l’é, scì, un attesto pe scrive un tòcco de bravua, ma a no se peu manco dî pe in davei fäsa, apreuvo ch’a l’assumme unna seu veitæ in caxon de l’arte do poeta; ne piaxieiva a descriçion da ciæabella mæximo se i patimenti do Cavallo foïsan tutti inventæ, perché tutti inte quarche momento semmo stæti sbattuggiæ in sa e in là da-o destin ò da-a pascion.

O Cavallo o pòrta avanti ascì a tradiçion di encòmi a-i duxi, e anche lì o tocca de çimme mai stæte toccæ in avanti: pe niatri no gh’à de importansa se i prinçipi stæti cantæ da-o Cavallo se meitavan pe in davei o seu lözo, quello che conta son e figue ancon oua fresche e vive da seu imaginaçion: e ombriñe, i loasci, o grongo, a moeña, e anghille e i atri pesci che festezzan l’eleçion à Duxe do Zòrzo Çentuion, con fâ «treppi e stravagançe da stupî» int’unna fantaxia mainaesca, ch’a l’arresta inta memöia do lettô.

Partensa per marinna

Partì da ra sò vitta,
Cara bella, oh che morte,
A carta, ò calamitta,
Confià ra sò sorte
Oh, che affanno, oh che vive,
duro da immaginà, no che da scrive.

Parto, ve lascio, oh Dio,
in quenti squarsi , e parte
l’annima in dive adio
se me strassa e se parte;
Unna stissa d’inchiostro
Com’è bastante à di quanto son vostro?

Son vostro ò Bella Cara;
Sarò vostro in eterno.
L’Annima in ogni cara
Farà vitta d’inferno,
Larga da ri vostri oeggi
che farala de care, ni de scoeggi?

Frusta, languida, smorta
da tutt’ore dolente,
L’odirei lì a ra porta,
Spirito impatiente,
Repricave in prezensa
Quello ch’a ve protesta oura in partensa.

Che a vuoi sola nassua,
Per vuoi sola a respira;
Che ro loego ch’a mua
Nò porrà moæ partira
Da ro sò proprio loego:
Da vuoi foera dra quà l’è dent’ro foego.

Ma zà sento ro tiro,
Cangio ro canto in chienti;
Mando questo sospiro;
Vaggo pe ri mæ venti;
Amò, che bella festa?
Comme posso partì, se ro cuoe resta?

Patì per gove

Pù che Amò me fasse vei,
oeggi belli desperæ,
quelli sguardi un dì cangiæ,
onde poei, se vorei,
fà ri cuoe resuscitæ,
sæ per mi ra pietæ morta:
no m’importa. Seimi rigidi in barcon
se me vei pe ra contrà;
in re veggie fæme fà
l’arbicon,

stæme in ton,
senza moeve ò parpellà;
pertuzæme ogni momento,
son contento. Gusterò d’esse giassòu
pe re bocche dri Citten;
d’esse foera dri mezen,
ballezòu

mordiggiòu,
com’appointo
d’esse à tutti ro sorasso,
ro scovasso. Ma se un dì me compatì,
che cangiæ con mi latin,
che mi monte ro scarin,
de poei dì,

che aggradì
ri mæ stenti in sciù ra fin,
oh, che amàreghi ben speixi,
che Pareixi.

Rossignuoe

De belle vòtte e cansoin do Cavallo reseunnan e melodie do conterranio e contemporaneo Gabriê Ciabrea, che inte ciù öcaxoin o gh’aiva manifestou a seu astimma.

Rossignuoe, che a son de chienti,
de lamenti,
ti pertuzi ra boscaggia,
che gran raggia,
che gran spinna,
te pertusa e t’assassinna?

Æla amò che, per bonombra,
forsi all’ombra
se trategne sotto l’ara
ra tò cara?
O martello
ch’a te dagghe d’atro oxello?
Se l’è questo ro tò sdegno,
semmo à segno,
no te manca compagnia;
girosia,
comme tie,
m’assassinna mi assie.

Femmo donca à ra foresta
dro mà festa
tra ri treppi d’este ramme;
ognun chiamme
ra sò bella,
ra battezze per rebella
E se à caso a no responde,
s’a s’asconde,
carreghemmoghe ri panni
con maranni;
s’a se muoeve
ti ni mi, no se descruoeve:
E se, missa all’accimento,
quarche chiento
ghe notassimo, o sospiro,
femmo un tiro,
demmo un crio,
con pagara d’un adio.

Chiarabella

Chiarabella,
luxernetta,
lanternetta,
stella picciena ma bella,
chi te ghia
fantasia
de passà così l’humò
ò chiù tosto ro tò Amò?

Quello raggio
de lumetto
così netto
ælo lumme da viaggio,
ò gioiello
per anello;
æla pria da ligà;
ælo fuoego, ò pù o ro pà?

Se l’è fuoego
bordellinna
o no strinna?
Come fato à trovà luoego?
Ti verezzi?
Ti garezzi?
Ti te poæri d’esse in Cé
con l’Inferno de derré?

Bella sorte,
bià tie,
così mie
mi ch’Amò me dà ra morte
mi ch’un forno
noette e giorno
in mæ vitta ho da patì,
ni me spero moæ d’uscì.

Figatella,
ferma, aspissa
unna stissa
à ra tò ra mæ faxella,
perché a luxe,
ma no bruxe
à ra crua chi ha tanta sæ
dro mæ fuoego, e no ro cræ

Rondaninna

Rondaninetta,
che inanzi giorno
pe ro contorno,
grillarinetta,
ti chiarli tanto
ferma un tantin ro canto.
Ti sæ che l’hora
dra mæ chiù cara,
quanto à desciara
no passa ancora.
Che fin t’indue
dunca à fara stà sciùe?
Forsi ro fæto
perché increscioza,
fastidioza,
s’heri a m’ha dæto
un dì de spinne
ancuoe ch’a m’assassinne?
O pù per gusto
che Amò chi ingrassia,
chi se sganassia
dro tò desgusto,
haggie ra pæsta
de veite in tanta festa?
Taxi pestummo,
che ri tuoe chienti,
ri tuoe lamenti,
ghe san de fummo,
lé se ne rie,
ti no dormi, nì mie.

Donna, serpente de l’inferno crùa

Un puritan orrô pe-a dònna, pöcassæ contrareformista e masochistico, o sciòrte feua inte çerti versci do Cavallo, ma no ghe veu guæi à accapî che ascì a descriçion di besiggi d’amô o l’é un attesto pe-i seu raffinatiscimi virtosiximi stilistichi.

Donna, serpente de l’inferno crùa,
uscìa da ro profondo de l’abisso
per métteme à sbaraggio e in compromisso
l’annima in terra per ro Cé nassùa.

Donna, à ro mondo, posso dì, vegnùa,
come Domenedé forsi ha permisso
per tormentame e fame in breve schisso
ro retreto d’unn’annima perdùa.

Zà che re mæ pecchæ me han condannòu
à così agra e dura penitensa
de pregà sempre un marmaro incarnaou,

sbatto in terra à ra fin dra patiensa,
e de tanti sospiri c’ho buttaou
ve demando ra morte in recompensa.

Ballin, ambasciaou dri pescoei à ro Serenissimo Zorzo Centurion, Duxe dra Repubrica de Zena

Inte st’avvoxâ öde pe l’eleçion de Zòrzo Centurion a-a supremma magistratua da Repubrica de Zena, o Cavallo o descceiga tutta a seu abilitæ retòrica e poetica, se ciammemmo poexia unna straordinäia capaçitæ tecnica e linguistica inta construçion di versci. Comme o fa osservâ o Toso, «tutto l’imaginäio de l’öde o l’é de fæto construto in sce de imagine e metafore artefiçiose donde a natua evocâ a l’à in realtæ pöchiscimo spaçio». Ma se porrieiva dî che a çelebraçion do Duxe a l’é pe-o Cavallo un attesto pe mette in mostra a seu meistria, sciben che no manca unna preisa de poxiçion politica in favô da corrente senatoiale repubrichista, pe contra a-i sostegnitoî d’un cangiamento in senso assolutista into goerno do Stato. O Duxe o l’é, infæti, pe-o Cavallo e pe-i repubrichisti, o poæ do pòpolo, e o l’é stæto misso da-o Segnô à cappo da Repubrica pe commandâ a-o pòsto do pòpolo che ghe pertocca a sovranitæ, ma che da pe lê o no saieiva bon d’exerçitâla. Ma a vea raxon ch’a l’anima a poexia do Cavallo, a-o de là do tema trattou, a stà delongo inta seu reçerca de inmortalitæ letteräia, o procuâse unna famma chi vagghe a-o de là da mòrte.

Da questi scuoeggi e care chiù vexinne,
onde spesso re ægue contrafæte
in campagne de læte
poeran chiappe de spegio crestalinne,
ond’oura à puinto pà
addormìo com’in letto in mà ro mà,
se non se tanto ò quanto ra sò paxe
desturba lenguozetto
quarche maroxeletto
chi pà chi innamoròu l’erbetta baxe,
tiròu da tanta luxe,
Serenìssimo Duxe,
ch’oura de nuoevo spande ra cittæ,
vegno, e m’inchinno à tanta maestæ.
Chi me sæ, ve ro dixe per menùo
quest’abito, esto pescio, esto cestin:
ro mæ nomme è Ballin,
pescòu per quarche famma conossùo;
Ballin matto attretanto
dra fóssina e dra ræ comme dro canto;
ro fin perché à ri pé ve vegne à cazze
è à fave donativo
d’esto pescio ancon vivo
à nomme dri pescoei dre nòstre chiazze,
ò chiù presto per segno
per tributo ò per pegno
dro nòstro bon affetto, appresentave
con questo don, dri nòstri cuoe ra chiave.

Parlo in nomme de tutti; son ben cærto
Gran Duxe, che parrà tròppo arrogansa,
per no dì confianza,
l’ardì mi òura d’arrivà tant’ærto,
che ri scettri e coronne
no se confan con pòvere personne;
ma nuoi , ch’à penna d’in Levante uscìo
ro só veghemmo in fronte
à ra chiazza, à ro monte
indeferentemente compartìo
pà ch’aggiemmo a certessa
in ra nòstra bassessa,
che ra mesma raxon milite e voære
con nuoi, de chi sei só, de chi sei poære.

Ra famma che de vuoi sentimmo spande,
Serenìssimo Duxe, d’ogn’intorno,
chiù chiæra che ro giorno,
chi s’ode resonâ da tente bande;
ro nomme chi ne svoera,
non che tra nuoi, pe re cittæ de fuoera,
come sen cose assæ de ræro inteize,
prodùan all’oreggia
stupó e maraveggia
da fà re mente attònite e sospeize;
se non che tutt’à un tratto,
pratticàndose in atto,
re miriuin dre vòstre varentixe
s’an per chiù grende assæ che no se dixe.

Oh, se un giorno con nuoi così da parte
lasciando per un pòco ro paraxo,
fuoissi presente à caxo
vuoi mesmo, à poei sentine quarche parte,
quando tutti de venna
discorrimo assettæ lì sciù l’arenna;
ò pù se ro gròu vòstro comportasse,
così per favorine,
con l’oeggio da seguine,
pe re care dri trémaggi e dre nasse;
che sentissi ri parli,
re prédiche e ri chiarli,
che femmo attorno d’ògni vòstro fæto
vuoi mesmo resteressi stupefæto.

Chi ve prica per òmmo de gran pieto,
chi per un Marte valoroso e fòrte,
Repubrichista à mòrte;
chi per un Salamon savio e discreto,
chi per un ræro scrittó,
chi per eloquentìssimo orató:
zughemmo à chi puoe chiùe sentì ch’ognun
fà de vuoi tanto cuinto
come se fuissi à puinto
un Sant’Eremo in mà, non che un Nettun;
aggiustemmo per pruoeva
che in vuoi solo s’attruoeva
tutte quelle virtù d’accòrdio unìe
che ri atri an tra tutti compartìe.

Un pòrta in Cé con tìtolo d’eterni
tanti suoi de Commissariati
per Paraxi e Senati,
in tant’atre vexende de Governi,
atri pòrtan per spegio
ra franchixe à voi dæta in privilegio;
atri van chiù avanti, incomensando
fin quando eri figiuoe,
con dì ch’ei mostròu cuoe
sempre d’esse nassùo pe ro comando;
in fin tra ló s’accòrda
tutti unii à unna còrda
che dra vòstra virtù chiù degno impiego
ra coronna saræ d’un mondo intrego.

Così, con fà dre moen mille forvoì,
l’un per l’atro à regatta invidioxi,
v’èrzan comme à maroxi,
re montagne dre laude e dri onuoì
nì se pà d’esse lé
chi no ve mette sciù ri sette Cé;
e spesso avven, che se in passando sente
questa gran parlaxìa
ò fregatta ò tarchìa
chi arrive da Levante ò da Ponente,
dæto lì sciù re vòtte,
così à remme maròtte,
quarche paræ per muoeo de barchezzo
s’accòstan ló assì tutti à un bolezzo.

Dìxan ch’an chiù re còrte forestere
in reverensa e veneration
Zòrzo Centurion
che no l’à Zena mesma e re rivere;
che fassemmo argumento
che se chì dìxan un, là dìxan cento.
Òura nuoi, chi s’odimo in sciù ra chiera
laodà còse laodemmo,
còse intro cuoe portemmo
confermaro per còsa tanto vera
pensæ vuoi, signor caro,
se in nuoi demmo gustaro,
se tutti quenti à crìo de sciabegòtti
demmo fàseve màrtiri devòtti.

Che chiù? Còse digh’òura d’avantaggio
nuoeva à mi, da che tratto ra marinna:
de sciù ra fregatinn-a
stava à puinto tirando ro resaggio
ro dì che à questo gròu,
Serenìssimo Duxe, foissi asòu,
quando à ro rebombà, che fæ ra valle
dri tiri dre fortesse
dre pùbriche allegresse,
pe re tanne dri scuoeggi da re spalle
vì mi con questi oeggi
giubilà pe ri scuoeggi
re gritte, ri cornetti, e ri ronseggi
ballà, fà ló assì ri suoe conseggi.

Vì sott’ægua ro zin méttese à sesta,
e per no comparei così spinoso
fæto giudiciozo
con re lanse asbassæ corre à ra festa;
vì ri faoli e patelle
fà chì e lì balletti e bagatelle;
là se veiva ro porpo e chì ra seppia
òura tutti asbassâse,
òura tutti drissase,
e in muoeo de contegno erze ra greppia;
chì re stelle dro scuoeggio
con ra coa de l’oeggio
vòtte à ro cé desfià quelle à guerra
con dì: «Se un Zòrzo è in cé n’é un atro in terra».

Maraveggie, e stupuoi no chiù sentii,
pe ra riva dro mà vei corre à sguasso
l’ombrinna e ro loasso
comme, per così dì, matti spedii,
fà per tutto cabille
ro gronco, ra murenna e re anghille,
ro mùzaro, ro pàgaro gentì,
l’orà, ro dentexòtto,
l’oggià, ro nazellòtto,
fà treppi e stravaganse da stupì;
stà lì comme passuin
ri tonni e storiuin
in muoeo da crià vòtti à ra riva:
«Zòrzo Centurion viva, e straviva».

Còse, in somma, signor, che s’òura odisse
mi mesmo quarch’un atro raccontare
tremeræ d’ascotare
non che de crære, solo se re visse;
diræ che tra poeti
s’uzan per fòre e diti consueti;
pù, da puoe ch’à notà sì gren misterii
à vossùo deputame
ra sòrte, e destiname,
re refero in sò gròu per Evangerii;
resta dunque concrùe,
da ro manco à ro chiùe,
quando ne tocche à nuoi mostrave affetto
se ro fa ri annimæ sensa intelletto.

Ma perché ro vorei pescà chiù à fondo
ro mà dri vòstri onoì, de sò natura
cruoezo fuoe de mezura,
saræ ra mòu temeritæ dro mondo,
resto con offerive
per schiavi ri pescoei dre nòstre rive,
ri quæ ve prégan con re brasse in croxe
tutti, comme conven
per l’ùtile, e ro ben,
pe ra prottetion de queste foxe,
sì comme v’offerimmo,
e Ballin pe ro primmo
in servixo dra Patria e dra Coronna
re famiggie, ra ròba e ra personna.

Restæ dunque felise,
mentre ch’òura in partise,
chiù assæ con ro cuoe che in apparensa
Ballin ve fa profonda reverensa.