Gioan Loenso Freirigo Gavòtti (1774-1843)

Nasciuo a-o Sascello da unna famiggia patriçia locale, o l’é introu inte l’òrdene barnabita do 1791 e dapeu o l’é stæto professô de retòrica à Foligno e à Loreto. Stæto tornou in Liguria do 1810, o l’é stæto institutô privou à Zena e à Saña, pe anâ torna a-o Sascé comme coadiutô do fræ, ch’o l’ea parreco do paise. In contatto con ben ben de personalitæ de l’epoca, comme o Spotorno, o Gavòtti o l’à scrito in italian ascì sazzi de istöia e de epigrafia. Into seu poemetto sascelleise Er quatter saxonj o rievoca a vitta de campagna, i travaggi inti campi, e veggee, e feste, à unna mainea ch’a no manca de liricitæ e de gusto personale. Inta seçion dedicâ à l’ötunno, comparisce de suggestioin letteräie, in popolâ l’Appennin de l’Otrazovo de Menadi e Baccanti che fan festa in onô de Bacco, inte unna aspoinia canson de vendëgna.

L’autunno

Za ch’ou vene ou ricco autunno
bseu ch’a cante un inno a Bacco,
ma dem primma un pò d’tabacco,
s’ou vorrei ch’a cante ben.
Dèmle prest s’oum l’orei dè,
altrimenti a’n pòss cantè!
Mé parei eu pers’ra testa:
a fazz’ tort au padre Baccu,
dem’ der vin, n’me dè d’tabaccu,
se d’nou l’estro ou n’bouie an sen.
Demle prest s’ou m’l’orei dè,
altrimenti a ’n pòss cantè.
…
Mira i rappi an s’ra colina
degni d’ess baxai cui denci:
dimm un pò s’i’n paren spenci!
Su Gicado e Ghirlindin,
ou n’è temp ciü d’oragné,
prest andoumma a vindigné
…
Aora l’opera ra bouie,
ognun taia allegramente,
e pis pis antant se sente…
Fanci, matte, araora sì…
l’armorazza an s’à da fè,
aora a Bacco ou s’dev pensè.
Se ra paia coi tizzonji
i s’acòstan, oh che sciamma!
Verbigrazia… peu… m’s’aciamma…
Ou capì còsa a veui dì.
L’armorazza a’n s’à da fè,
aora a Bacco ou s’dev pensè..
…
Cich e ciòch, anzumma à l’ase
ch’porta un vegg mezz’amberiago;
ater ch’mezzo… un louvo, un drago,
o i va apresso, un struzzo, un lion.
Viva Bacco, a sent bragè,
d’ògni cant, viva, evoè!
Ecco er Menadi baccanti
con i Satiri cornui
e capripedi e barbui
ch’van ballando an confusion.
Viva Bacco a sent’ bragè
d’ògni cant, viva, evoè!
Ma ou vè Bacco finalment
ans’un car ch’i louv j’anlazan…
Ahi, ch’i m’pestan, ahi, ch’i m’fiazan;
comm’andrara? Mi a ne l’seu.
Bacco aiutme, i n’ me lascè:
senza ti mi a n’seu comm’fè.
Bacco ou beiv, ou canta, ou rie,
ra man stend, m’aranca, ou m’tira,
aora sì ch’ra testa m’gira,
aora sì ch’ou m’manca er coeu!
Bacco, aiutme, i’n me lascè:
senza ti mi a n’seu comm’fè.
…
Ma ra test’ou m’pà ch’a m’balle,
giacmo giacmo i m’fan er znugge
ou m’vè sogno, i’n son gandugge!
Cantè voi, fieui car, s’ou sei,
dem da beiv, ch’a n’seu comm’fè
senza beive a terminè.