Luçetto Ramella (1917-2014)

Nasciuo à Inëia, o comensa a seu attivitæ de promotô da lengua ligure do 1977 con unna scistematica cheuggeita in sce nastro de testemonianse de unna geneaçion in fase de lesto cangiamento. O fissa e seu espeiense inte ben ben de volummi, tra i quæ Oneglia, Oneglia bella (1978) e inte A Cengia (1979) donde o recheugge e fiastròcche, i proverbi, i mòddi de dî, e föe e o ne presenta træti de vitta do passou: i zeughi, o travaggio in tæra e pe mâ, a meixiña tradiçionâ. Dapeu Basse bassette (1980) e Dodici poesie di Liguria (1984) son cheuggeite de poexia in ligure e in italian, tanto che Careghetta d’öo (1981) a l’é unna piaxeive grammatica che o Rohlfs o definisce, pe-o seu genere, «un veo cao d’euvia». Degno de nòtta l’impegno into tiatro dialettale. Unna seu comedia (Cacelotti e ciantafurche), transcrita in volumme do 1982, a l’é stæta çernua da-o Commun de Impëia pe solennizzâ i sciusciant’anni de vitta da çittæ, portâ in scena da-a compagnia Benedusi. O Ramella o l’é conosciuo ascì comme gastrònomo: e seu Ricette tradizionali della Liguria son un volummetto omai tegnuo pe un clascico che con ben ben de anni de antiçipo o recommanda unna çerta mainea de alimentâse ancheu conosciua comme dieta mediterranea.

Basse bassette

Quandu a l’eu picenen
in ch’in sciùsciu sulu
a l’aveeva vusciüu smurtâ
tütte e basse bassette
che in ta nötte funda
i vuava in ta vallâ.

Aù che a son cresciüu
a nu son tantu scangiau:
au ciàiu da lüna
a m’accuntenteeva
nu de smurtale tütte
ma de assèndine üna.

U viandante

I-na bursacca veggia appesa au collu,
patèlle ai péi,
ai fianchi i-na franèlla,
in pâ de braghe a righe,
u passu stancu,
u se ferma a beve l’àigua a’a funtanella.

Dunde ti vai, bell’ommu, pe sta stradda?
Forsci i-na mâi au spéta là luntan,
forsci in travàiu,
o u pensa a i-na garsuna
che magari a s’è zà maiâ
lazü au paìse, stanca de aspitâ…

Ma vellu u beve u beve e u nu rispunde,
u sguardu ch’u te mìa e u nu te vé:
forsci u l’è in mattu,
forsci u l’è in gran saggiu
che u pureeva andâ in carossa
ma u va a pè.

I soi prublemi u i porta in ta bursacca.
Perché u camìne dunca u nu se sà.
U beve ancù in sciàu d’àigua a’a funtanella,
u scrolla in pocu a testa e u se ne va…

A veggetta

I-na veggetta stanca
sula in ta sò stànsia
a pensa ai tempi longhi
da sò infànsia…

U n’è passau di anni,
a n’ha streppau di föii au calendaiu…

I regordi.

Sò pâi, a mâi Virginia,
Censen, u primmu amù
(a cunserva ancù
in penscieu passu in tu vucabulaiu…)

Sò fìu,
bravu cumme in sù,
mortu in tu trentasinque in Abissinia.

A begatta de péssa,
u vestì giancu da Cumenion.

Nint’autru:
tütta a sò vitta
a stà in t’in pessigu…

Ina lagrima
ch’a brüxia, a brüxia, a brüxia
a ghe china zü p’a faccia.

A veggetta
a se sente ancù ciü sula…

A dixe in’uasiòn
e a smorta a lüxe.