Conseggio pe-o Luiggi Anselmi (1900-1983)
Autô de tante maccette portæ a-o successo da-o G. Marzari, tra e quæ regordemmo Giöxe o lattonê, o Gin do Tappo, A tomata de Babilònia, a Cagnara, o Luiggi Anselmi o l’ea fornio de un vivo senso umoristico e da un aguo spiito d’osservaçion. Comme tanti personaggi do spettacolo còmico, peò into seu carattere o l’aiva un fondo de melanconia ch’a sciòrtiva feua de semme in çento, comme inte ste «Pagine de diario», meditaçioin nataliçie che son stæte pubricæ in sciâ revista Zena do 1959, e ne fan vedde – tra e seu intuiçioin poetiche – fin à che ponto a seu formaçion coltuale e umaña a foïse in debito con unna çerta mentalitæ ancon euttoçentesca, tòsto da romanso d’appendixe, a mæxima che poemmo attrovâ, à exempio, inta poexia do Giambattista Vigo.
Pagine de diario (1959)
Ti, vegio mainâ, abituou a-e tempeste da vitta. che in sce unna spiagia da nòstra Rivea, assettou in sce un scheuggio, ti fissi l’orizzonte pensando à tutti i Natali che t’æ fæto in navegaçion, lezendo, de bassa proa, l’ultima lettera da casa, ricòrdite unna cösa: o mâ o l’é sempre o stesso, solo che i òmmi i scangia.
Ti, ricco possidente che ti vivi in agiatessa, no privandote de ninte, primma de mettite à toua, ti gh’æ miga ammiou se inta scaa gh’é quarchedun ch’o cianze?
Ti, viandante sensa meta, che ti væ pe-e stradde do Mondo, sta neutte a stella ch’a te guidda a l’é a mæxima ch’à guiddou i Re Maggi!
Ti, artista fanatizzou da-i successi inmediati, no ti pensi che tutto o l’é effimero e che doman o finisce? Anche se a fortuña a t’à visto, no umiliâ i teu scimili. Doman ti peu ëse a-o seu pòsto.
Ti, preseppio fæto in casa, che pe anni t’æ visto riunia tutta unna famiggia. Dimme quest’anno quante ghe n’ammanca?
Ti, vegio corsaro di ritreuvi notturni e divoratô da «fiches», dove son staneutte tutte e teu conquiste? A bilia da roulette a s’é fermâ in sciô zero.
Ti, eròico fante do 18, che ammiando unna vegia mantelliña ti ritorni con a mente in sciô Grappa, in sciô Carso, à l’ægua, a-o vento, a-a neie, sotta a-i bombardamenti, cöse n’é staneutte di teu amixi de trincea? Ciammili: son presenti.
Ti, vegio clown da circo, che stanco inta carovana ti t’ammii into spegio, perché t’ê tanto triste? Pensa, no ti gh’ê solo.
Ti, figgio unico capriçioso e pin de smòrfie pe unna demoa, e che ti cianzi pe unna lampadiña asmòrta in sce l’erboo de Natale, fatte spiegâ da-a nònna primma de mangiâ o pan doçe cöse veu dî a paròlla «orfanatròfio».
Ti, gianco fratte françescano, che inta quiete do convento, à l’ombra d’un chiòsco,ti preghi passaggiando. Dimme, o viagio de là o l’é tanto longo?
Ti, vegio platano de l’Accasseua, quante figgeu, quante galanti e quante partie à damma t’æ visto? Beato ti, che t’aspeti a primmaveia! Contemplando e teu feugge in tæra vivo de speranse.
Ti, donnetta de l’Albergo, vegia enciclopedia de ansce, sacrifiçi e dispiaxei, into scaffale do tempo. Anche se tutti t’an abbandonou, vivi inti teu ricòrdi e perdoña, perdoña sempre. Questo o l’é o giorno.
Traduçion italiaña
Pagine di diario (1959)
Tu, vecchio marinaio, abituato alle tempeste della vita, che su di una spiaggia della nostra Riviera, seduto su di uno scoglio, fissi l’orizzonte pensando a tutti i Natali che hai fatto in navigazione, leggendo, di bassa prua, l’ultima lettera da casa, ricordati una cosa: il mare è sempre lo stesso, solo gli uomini cambiano.
Tu, ricco possidente che vivi in agiatezza, non privandoti di niente, prima di metterti a tavola, hai per caso guardato se nella scala c’è qualcuno che piange?
Tu, viandante senza meta, che vai per le strade del Mondo, stanotte la stella che ti guida è la stessa che guidò i Re Magi!
Tu, artista fanatizzato dai successi immediati, non pensi che tutto è effimero e che domani finisce? Anche se la fortuna ti ha visto, non umiliare i tuoi simili. Domani puoi essere al loro posto.
Tu, presepio fatto in casa, che per anni hai visto riunita tutta una famiglia. Dimmi quest’anno: quanti ne mancano?
Tu, vecchio corsaro di ritrovi notturni e divoratore di “fiches”, dove sono stanotte tutte le tue conquiste? La biglia della roulette si è fermata sullo zero.
Tu, eroico fante del 18, che guardando una vecchia mantellina ritorni con la mente sul Grappa, sul Carso, all’acqua, al vento, alla neve, sotto i bombardamenti, cosa ne è stanotte dei tuoi amici di trincea? Chiamali: sono presenti.
Tu, vecchio clown da circo, che stanco nella carovana ti guardi nello specchio, perché sei tanto triste? Pensa, non sei il solo
Tu, figlio unico capriccioso e pieno di smorfie per un giocattolo, che piangi per una lampadina spenta sull’albero di Natale, fatti spiegare dalla nonna prima di mangiare il pandolce cosa vuol dire la parola “orfanatrofio”.
Tu, bianco frate francescano, che nella quiete del convento, all’ombra di un chiostro, preghi passeggiando. Dimmi, il viaggio di là è molto lungo?
Tu, vecchio platano dell’Acquasola, quanti bambini, quanti fidanzati e quante partite a dama hai visto? Beato te, che aspetti la primavera! Contemplando le tue foglie a terra, vivo di speranze.
Tu, donnetta dell’Albergo dei Poveri, vecchia enciclopedia di ansie, sacrifici e dispiaceri, nello scaffale del tempo. Anche se tutti ti hanno abbandonato, vivi nei tuoi ricordi e perdona sempre. Questo è il giorno.