Zane Andria Spinoa (1625–1705)

O l’appartegniva à unn’inlustre famiggia patriçia e o l’é stæto do 1673 Goernou da Còrsega, ambasciou à Madrid do 1678 e ascì Goernou de Saña do 1692. In contatto con ben ben de academie e lettiæ italien, o se conscideava, comme de fæto o l’é, l’inventô do melodramma pe muxica con de parte in zeneise; inte seu euvie, L’Ariodante inspiâ à l’Ariosto, L’Euròpa træta da-a mitologia grega, e La perfidia fulminata da Sansone da-a Bibbia, stæte scrite pe ëse misse in muxica, o l’introdue di personaggi che cantan in zeneise. Comme gh’é da aspëtâse, gh’é a mascara do Capoâ, che inti drammi do Spinoa o l’à de caratteristiche ciù poxitive, in confronto a-o personaggio za stæto portou in scena da-i seu predecessoî. Fòscia pe-e condiçioin politiche ömai cangiæ, co-a Repubrica meno condiçionâ da-a politica spagnòlla, o Capoâ o pâ meno dispòsto à cegâse de fronte a-i potenti.

Inte sto monòlogo destinou à ëse cantou, o Capoâ, à parte a seu bravua guerresca, o l’avvanta, cösa insòlita, e seu capaçitæ de cheugo, fra doggi sensci e alluxoin no sempre de bon intende.

Zà che voe ro destin
che stagghe in questa terra,
terra da fà pugnatte
con fà ro mié mestié de guardaspalle,
me son trovao da sbatte,
che sta ponseverasca
che à faeto ciù scabeccio
che no fa ro lebeccio,
bollezzumme e borrasca,
con fà d’ogni erba un fascio
me fa guagnà ro giascio.
O Zena, bella Zena,
ò libertæ da matti
quanto t’ò sospirao!
Ma stimmo che assì pòco
ti non viræ sì spesso
un altro paro mio
bravo à ro mesmo tempo e leccaresso,
chè veramenti à dìssera
de fà leccummi e intingoli
potaggi e condimenti
da fà prevaricà ra continenzia
ne sò ra quinta scienzia.
Sò inscià ri maccaroin
à forza de crestè,
sò giusto comm’o va
coexe ro mattamà;
sò serne dri cappoin
ro come se ghe dixe,
ro pieto dre pernixe,
ra coescia dra polanca,
l’ara dro pollastretto,
e per un bon boccon ro pastissetto.
Ma ra descretion
l’æ de savei mangià
tutto à ra sò saxon,
de luggio ri piccioin,
re quagie de settembre,
pernixe de dexembre,
e ro nittoranin
verso ra fin d’arvî;
sorvetutto tegnì
con ròba de sostansa
sempre ra panza in stiva:
e quanti leccaressi
traónnan ra sariva!
Ma dra bravura poe
còse diremmo nuoi de sto faxoe?
L’arte da pettacchinna,
quella dro tavellà
doe die de ra tetinna
no son fòscia quell’io chi l’à trovà?
Andaghe à latin fæto
e intro doggià dro canto
«baxo ra man, patron»,
co ro parmetto intanto
faghe un atra gassetta à ro gippon,
no fuì mæ invention?
Ri gippoin de l’appato
ri sfrixi co ro fiòcco,
ponze co ro sagoggio,
re canne incameræ,
re pointe desnoæ,
ro toò, ro «chi va lì»,
no ro trei foera mi?
Ro Spezzin chi l’à stratteiso?
Chi à marcou Barbazerà?
Sparapan chi l’à strinao?
Bernardin chi l’à frappao?
Tæ, tæ, donde me perdo,
còse me ven in coe?
Stareiva tutt’ancoe
se voresse quintà
quello che mi sò fà.
Ma se no fan ri oeggi cierabelle
ro ducca mié patron, sció pòro niescio,
l’é chì ch’o ven con quella sò lillonna.
L’æ ben che me ne vagghe,
pre non daghe soggetto,
perché fan tra ló serte carezze
ch’an dre domesteghezze,
e a l’é tanto deméstega in effetto
ch’a comensa à pittà ro pignoretto.
Mi, che non son bollaxo,
osservo, pappo e taxo.