Cecco Rosci (1880-1942)

O scrive o Giöxeppe Castellan inta seu antologia Raccolta di poesie in dialetto onegliese à propòxito do Cecco Rosci: «Nasciuo e cresciuo à Inëia inte l’ambiente de mainæ e pescoei de Bòrgo Peri, o n’à sentio tutta l’attraçion, o n’à capio a puritæ, a fonda onestæ, scintetizzæ inte l’amô pe-a famiggia, pe-o travaggio, pe-a morale de Cristo. Ste seu pascioin o l’à concretizzæ, avanti comme attô inta filodramatica locale «Cuore e arte», stæta fondâ verso o 1900, pe eternizzâle dapeu inte seu compoxiçioin dramatiche, che treuvan o seu mascimo inte U campanen di Peri.» Chì coscì reportemmo o finâ da comedia, ch’a vedde contrapòsti «Poai Culen», o vegio mainâ de profondiscima fede religiosa, e o galante de seu figgia «Cichen», libeo pensatô, communista e anticlericale, ch’o finisce pe convertîse.

Da U campanen di Peri

Pe-o vegio mainâ Colin, no se peu vive sensa a fede e a speansa into Segnô, ch’a dà unna giustificaçion à unna vitta diffiçile comme tutto, lontaña da cà e da-a famiggia pe-o ciù tanto do tempo, e e preteise di zoeni de fâ de meno da religion, peuan soo che ëse sensa senso e sensa raxon.

POAI CULEN:
Mi, pe dì a veritè, a nu me ne intendu,
ma mi a me demoandu: cumm’u se fa, sentendu
sta müxica, sti coanti, sta campoana da vixen au moa
sensa sentìve l’agnima, u coeve tremuroa…
Mi, sciben ch’a segge in poveru pescaù
grezzu cumm’a stüggia, e ben, ancura aù
veggiu cumm’u cüccu (e ch’a n’ò passau toante!)
ebeñe, quoande a sentu cantoa ste cose soante,
ebeñe, a u cunfessu, a cioangiu: U me coe
u tremura, u sbatte, u s’alloarga; u nu voe
ch’a me destacche de lie. E dì che e me uregge
i n’an sentiu da müxica! I pan de quelle scoegge
ch’i se ghe sente u moa. Diu, che de sunadde
ch’i t’añe za sentiu! Fischi de lebecciadde
ch’i te purtoava via, ch’i sciüscioava, i t’insurdiva;
crii de marinai, vurai lasciü daa riva,
e ciü savürru ninte.
De noette, inta fusca, ti sei lì de vedetta,
bon, ti senti a corna, u fischiu, a campanetta,
ch’a te dà l’alloarme e in ressautu au coe,
ch’intramenti u soffre, u pena; ma u nu voe
u nu pò lascioa stu moe, ch’u l’à a calamitta!
Drentu a ghe muriremu, ma scì, u l’é a noscia vitta!
Ebeñe, cum’i fañe, a diggu, certe gente
passoa lì daa gexa, passoaghe lì d’arente,
sensa entroaghe drentu, pe pioa u perdon?
Ma mie sta gexetta en cuu campanen riundu,
sciben ch’a fusse asquoaxi aa fen du mundu
a nu l’ò mai scurdaie; macché, a l’é allura
ch’a me vegniva in mente. A l’era a me demura
de vemela davoanti, lì, davoanti ai oeggi,
ch’a fuscimu in bunassa, o dunca inti scoeggi,
sempre, sempre, de longu. I dixe: nu avé fedde!
Sti zuvenotti i fan vé ch’i nu credde
credendu de foa l’ommu! Ma mi a ghe scumettu
che quoande i son lì drentu i l’an u figarettu
batellusu, oh scì scì. Povera me gexetta,
e me bellu campanen. Che desdiccia, che vendetta,
d’avé derfau i Peri! D’avene spantegau
dui livve, dui lavve, à cavve du diau!
Tant’è, a nu fa ninte a semmu sempre nui,
fii de marinai, razza de pescaui,
nasciürri à l’oaria averta, cresciürri in sciu moa,
desmanegai, descaussi, negri, brexiai daa soa,
ma forti cume scoeuggi, ma broavi cumme u pan,
gente ch’a te partimmu p’andoasene luntan,
lazzü, aa malafoera, purtenduse intu coe
sta noscia bella Ineia, sti Peri, u nosciu moe…
Ma poei pe vegnì turna, vegnìte da vixen,
a murìsene aa to umbra, me bellu campanin.