Danila Oivê (1955)

A l’é prescidente do Salòtto Letteräio «Pen(n)isola San Marco» de Sestri Levante e a fa parte da giuria do Premmio Internaçionale de Poexia e Narrativa Giovanni Descalzo. A l’à esordio co-a scilloge de versci in lengua italiaña Sole di scirocco (Montedit), vinçitoa do Premio Internazionale Città di Monza 2002; l’é vegnuo apreuvo e cheuggeite premmio pubricæ da Montedit Voli nel profondo (vinçitoa do Premio Nazionale Francesco Moro, Pavia 2003); I giorni della merla (vinçitoa do Premio internazionale Città di Monza 2006); Le parole del vento (Premio Internazionale Città di Monza 2011); Il mio raccolto canto, (Premio Nazionale Città di Melegnano 2012). Inta collaña di Ciottoli, querni e coltua ligæ a-o territöio de Tregosa, a l’à pubricou doe scilloge che contëgne de poexie segge in zeneise che in italian: Stella cometa à Tregosa e Drito e reverso, Gli occhi. A-o propòxito da seu neccia de scrive in zeneise a dixe: «Me son missa à scrive in zeneise perché çerti regòrdi ligæ a-a mæ infançia e à çerte persoñe che n’à fæto parte m’ea cao de esprimmili inta mæ lengua do cheu e di affetti. Fin à pöchi anni fa ò parlou o zeneise in casa con mæ poæ ch’ò l’é mancou à novantequattr’anni». De lê o l’à scrito o Mario Dentone: «Son tante e compoxiçioin in zeneise da Oivê, e tutte conservan quello mondo piccin da vitta mæxima de l’autoa, e ògni recanto de mâ ò de bòsco, cà e giardin, inta poexia o se fa un pittin comme a cioenda leopardiaña, cösa picciña che peò a descciöde l’infinio, ch’o l’é dæto da-i regòrdi sensa zinâ, donde bollâse co-a feliçitæ retrovâ inte ògni verso, fiña inti momenti tristi, de dô e nostargia, perché a poexia a l’é consolaçion…». E o Francesco Mario Rossi: «versci da Danila Oivê, in lengua zeneise, an tutta a peculiaritæ da vea poexia. Se î traduxemmo in lengua italiaña vëgnan à ëse quarcös’atro, ciù freido, destaccou e sensa a melodia do son natuale… Coscì [in zeneise] nasce de assonanse, allitteraçioin, rimme con unna muxicalitæ ch’a l’à o savô “d’unna vòtta”, ch’a reprodue i soin e o profummo do mâ, o franze de onde e o sciuscio do vento».

A seia do lebeccio (à mæ figgio)

Ti t’arregòrdi? I lampi da stæ,
menissavan a ciappa da neutte –
äia e ægua mesuavan o fracasso
di troin e de profonditæ.
Mille e ancon mille bisce
de splendoî separavan çê e mâ
che o beuttava o sbraggio de inciòstro
in scê agogge de l’æña in boriaña.
Ammortâ pòi a sæ,
de incanto o se stava
a seia do lebeccio, à ammiâ
o miacoo do mâ.

Rexiñe de ödoî imbeviæ,
inti euggi l’argento
de scciumme fregoggiæ
co-a raggia che i maoxi
accugeivan da-e man do vento
e e nòstre die unie
inte ’n intresso de vibraçioin
inluminou da-a pupilla
da neutte schillente –
cavagno pin de emoçioin,
groppi streiti che sempre ne lighian.

Into cheu o canto de mæ moæ
quande a seia do lebeccio
in sciô mâ a spalancava i barcoin

L’urtima partensa

– Veddiò Romma – lê a m’à dito
mentre a chinava – un à un –
i scain de partensa
e menissi figgeu de luxe
ghe rieivan inti euggi
che me caezavan sensa sprescia.

Vedde Romma, pe mæ moæ
o voeiva dî riscattâ
l’etæ feliçe arröbâ –
a fabbrica tròppo zoena
o giamminâ da guæra.

Terni moderna, grixa
a s’è fæta cappolinia,
ma o splendô eterno de Romma antiga,
fòscia lê a l’à vixitou,
inta legia luxe celeste
do lento destacco do còrpo
– into fondo seunno sensa retorno –
tra o creppo e l’urtima partensa.

Lascime, tempo

Lascime, tempo – lascime te prego –
ancon pe ’n pittin,
spedio passo leggero
e graçia de gazzela sottî.

Fanni l’incanteximo
ti che t’ëi complice,
fanni lento o tò anâ – vanni ciù cianin –
oppù luxinghime de inganni.

Pòi sensa zinzannie, sensa ’n interruçion
repiggiò o cammin.
Fòscia no me fermiò à l’urtima staçion
in sce l’ordio do çê.

Perché – ti sæ – tempo,
comme a scia gianca de l’apparecchio
pertusiò o turchin
e osiò l’inmenso.

A teniessa da stansa

Ammia… oua a t’annia sfinia
a seia, co-o seunno che o scancella
a passoa con l’aa feria
in sciô scain nuo de pria,
o a scua fattua
da farfalla neigra
pösâ in sciâ tò man
che za a saveiva o naufragio.

Smarrio o vivo tempo figgeu
di penscëi che anniavan xeui
de ascosi batticheu –
tenie voxi inte stanse
e doçi ödoî de sciô d’angeo
deslenguavan e ombre do giardin.

Appeiso a-a lumea da seia
che a fava ciæe e poule
a-o canto perso de reuse,
o foise restou armeno
o scorpion, inmòbile
inta luxe da lampa,
à custodî a teniessa da stansa.