Luçian Rosso (1683-1754)

O Luçian Rosso, de Campo Ligure (a-i seu tempi Campo Freido), saçerdòte e meistro de scheua, o l’ea un erudio, ch’o l’à scrito in latin, italian, zeneise e campeise, into segno da sperimentaçion lenguistica. Poeta còmico de stampo baròcco, in scê orme do Giulian Rosso, into seu poemetto Pervæzze in sogno der meister da scoeura de Morære o compoñe unna satira contra e dònne tutta fondâ in scê caratteristiche fonetiche e lescicale da parlâ de Campo, euvia interessante pròpio pe-a documentaçion lenguistica in scê parlæ de l’introtæra à quelli tempi.

Da Pervæzze in sogno der meister da scoeura de Morære

O Dê Apòllo o comparisce in seunno a-o poeta e o ghe caccia in euggio d’avei abbandonou l’attivitæ letteräia: o Rosso o reprica che a corpa a l’é de Muse, ch’an avuo o moro de ciammâghe unna poexia in loude de dònne, quande san beniscimo che lê e dònne o no ê peu vedde. Satira antifeminista, ch’a se reze tutta in scê invensioin verbale de unna lengua mai stæta deuviâ in lettiatua avanti quelli tempi.

Auvì che indegna dmanda d’quei bei cui,
s’ancallan dime fin, quei tanardelle,
ben che n’pòsso vei fomne né fommelle
che - ma miræ che tratti callarui -
che fazze mi un poema sovra ar blezze
der dònne, e sovra a tutte er sò pervæzze
…
Ve vegne er mà d’lovetto, ò polle væcche,
ve pòssle scæ e chervæ de lengua un tòcco;
possavi avei ra vitta carià d’zecche:
ei smòso ist’còse à mi cme fosse un gnòcco?
El sei voi, se non ei o zervel semmo,
che mi d’laudæ is donnuzze en son malæmmo?
Dimme aora, o Febo, non ò avù rason
d’vegnì cor Muse ar gròsse, e d’partì er pan?
Non vòssi mai (parlando con perdon)
che barba d’òmmo me bruschisse an man.
Mtive, ve prego, un pò ra mè camixa,
per cnòsce d’quer belluffe l’aspertixa.
…

O poeta o reçita à Apòllo sti versci, stæti compòsti dòppo ch’o l’à taggiou i ponti co-e Muse:

Se passo in sdrucciolo
guai alle femmine
perché mi subbito
dirò chi son:
con veina facile
con metro fluido,
con tutto garibo
farò che paiano
tutte simon.
Sai chi son femmine?
Son vattre e sciummie,
giorgiattre e mummie
e sgrizzore;
son gatte e spuzzore,
tègne e scorluzzore,
prazze e pettegore,
crave e scarciòffole,
e grigore.
Sai chi son femmine?
Scorpne e bicciaccore,
dsuttre e zibæccore
e sgraxore,
mastre e mandravore,
squeillazze e tangare,
ospiai e bazzore,
carògne e sbrazzore,
e smòrfie.
Sai chi son femmine?
Rinzose cràppole
trabucchi e trappole,
tertui e guai,
maranni e ciappore
scotizzi e lappore,
scrappe e barattole,
scalòrnie e piattole,
brutti animai.
Sai chi son femmine?
Lippre e nasippore
giaunummi e cròniche
e grimore,
bertuzze e zingare
zigheugne e bergore,
reme e casærbore,
cavagne e sgærbore
e sgrammore.