Oliviero Olivari (1882–1975)

O l’ea nasciuo in provinsa de Mantua e o l’ea stramuou do 1908 à Zena, dond’o l’é stæto pe ciù de quarant’anni impiegou do Commun à l’Offiçio anagrafe. Fin da zoeno o scriveiva pe-i giornali e ciù tardi o l’à descoverto a seu pascion pe-o tiatro; za à partî da-o 1920 con Feua de colisse, pe-a compagnia da Rosetta Mazzi, dapeu con Ægua ciæa a n’ammaccia, do 1923, pe-o Riccardo Pittaluga, e O vexin (1927) pe-o Gilberto Govi, fin a-i atti unichi de mez’oa ognidun, stæti trasmissi da-a RAI into doppoguæra, comme O fæto de çioule (1956) e Pittaluga e Sciaccaluga (1966), o nomme do Olivari o l’é ligou pròpio à st’andio d’arrecampâse tutta a famiggia d’in gio à l’aradio tutte e domeneghe à d’oe dòppo disnâ, pe «sentî parlâ zeneise» a-o manco unna gramma vòtta, andio ch’o l’è duou scin a-o 1970, quande a RAI a l’à soppresso a trasmiscion, pe varie raxoin; tra i atri nommi de quelli anni, che ne tegnivan attaccæ à l’appægio radiofònico inti giorni de festa, beseugna mensunâ ascì V. E. Petrucci, C. P. Pessin, E. Balbi, L. Anselmi, G. Marzari, P. Guidoni. Pe dâ a-o seu scrito unn’intonaçion ciù viaxa e sccetta o Olivari o travaggiava in cobbia co-o seu amigo Eugenio Monchiero, e beseugna dî che a qualitæ do zeneise che deuviavan a l’é degna de nòtta (à parte e sòlite inçertesse de grafia). I intressi de comedie do Olivari en senci comme tutto e de belle vòtte i personaggi descazzan inta maccetta, ma no se peu denegâ che un çerto savô de Zena de unna vòtta o n’arreste inte l’äia e inta memöia à lezile e à sentîle torna.

Merli e roscigneu (1946)

Doî caccioei contamicce passan a neutte inte un paise de l’entrotæra, donde tutti gh’an a pascion da lirica; pe scroccâghe unna çeña dan da intende che son doî cantanti d’òpera, ma à sta mainea s’attreuvan constreiti à promettighe un conçerto pe-a seia apreuvo, tanto che a-a dreitua addescian e speanse, no solo artistiche, de unna cantante mancâ, a moggê do speçiâ da dròghe, no san comme fâ à sciortîne con elegansa. O saià o caxo ch’o ghe daià unna man.

Leonöra

Oh, ma eccellense… scià me permettan, in nomme de l’arte, a libertæ… e pöi, mi scignoa e loro cavalieri… sciâ compatian, veo? (solenne) Ma… scià ô san ben che è pericoloso e nocivo accingersi alle nobil fatiche del canto con un steumago pin de çibbo…

Nicòlla

Mai ciù… mai ciù… vea, Doardo? … pe noiatri, ançi…

Doardo

… ançi, ciù gh’emmo o trippin inscio de röba, e cantemmo ancon ciù ben!

Nicòlla

(sottovoce) Oua stà à sentî cöse ghe conto! (ad alta voce) Scià se figure, sciâ Leonòra, che unna vòtta a-o Carlo Feliçe son montou in scena into Trovatore che aveivo collou un grilletto coscì de trenette co-o pesto… un quarto de bibin à ròsto, formaggio, dosci, fruta e unna bottiggia de barbera… e ghe garantiscio che n’ò mai cantou coscì ben «Di quella pira l’orrendo foco», con quello «dò» che à momenti o fa deruâ o tiatro da-e cioccate de man… Mi creddo che o segge stæto o bibin à dâme quello bello sponcion de «dò» de peto!

Leonöra

Oh, ma comme scià l’é spiritoso!… mi me demoo un mondo!

Doardo

(c. s.) Stà à sentî, Nicòlla, che bomba te ghe sparo mi oua. (ad alta voce) Se sciâ savesse, sciâ Leonöra, cöse m’é capitou à mi à Milan. Cantavo o «Barbiere» a-a Scala. I amixi zeneixi e milaneixi m’an vosciuo à çeña con lô. Risòtto co-e triffoe, cappon in gelatiña, pescio con maioneise, formaggio, træ fette de panetton, fruta, vin in abondansa, licori, cafè… Quande son montou in palcoscenico boffavo comme unna machina da ferrovia, segge pe-o cado che pe-a pansa piña… Eo rosso comme un biscion… O direttô d’orchestra gh’é vegnuo mezo açidente… e o l’avià dito: questo chì o l’é imbriægo desfæto… o direttô de scena gh’é vegnuo da patî into sbirciâme… E ben, caa sciâ Leonöa, o l’é stæto un trionfo mon… dia... lee! A famosa cavatiña l’ò dovua non bissare… e manco trissare… ma quadrissare!

Leonöra

Oh, ma che spiritosi!… e quande a l’é coscì, bon appetitto, eccellense, e per molti anni!