Conseggio pe-o Rinaldo Avegno
Di anni ’70 do secolo passou o l’à pubricou Zimme do cheu (1970), Vento de mâ (1972), Aia de Zena (1975), Arcobaleno de Zena (1977). Autô che fin da-o prinçipio o l’arresta in bansa fra un bossettiximo rievocativo e o sentimento, ligou à l’ambiente da Canson Zeneise, pe-o seu descrittiviximo, pe-a senscibilitæ a-o mondo da natua, o l’é ben ben vixin a-o Gismondi, ma quarche vòtta e seu descriçioin arrivan à unn’intonaçion metafixica, fòscia in desdaxo, comme inte sta «giòstra» de fantaxime, ch’a gia à veuo, à scimbolezzâ speanse e inluxoin da vitta.
A giòstra
Unna giòstra ch’a gia sensa fermâse
da tante luxi vive inluminâ,
unna muxica allegra, un tròtto d’ase
ch’o cammiña bindou sensa sostâ…
A giòstra a gia, ma i cavalli, e giraffe,
i strussi, e carossette
co-i bòrdi d’öo
e i vellui di sedili consummæ
son veui… deserti… no gh’é ciù nisciun…
E l’asenetto o tròtta ancon ciù svelto
inte un çercio serrou
sensa prinçipio e fin…
a giòstra a core
a gia sempre de ciù,
a muxica a no peu tegnîghe apreuvo
e a l’arranca affannando anche lê.
In çê sobrilla quarche stella spersa
ch’a tremma appeña appeña,
o mâ o franze a-a spiagia
e o caressa l’ænin…
Ombre… solo ombre
in sciâ giòstra ch’a gia…
ombre veue
sensa euggi né man…
s’acciappan, se lascian,
satan da-e carossette in scî cavalli
a-o còllo de giraffe,
comme un xeuo de rattipennughi
inta neutte…
A giòstra di fantasmi a gia pe sempre,
giòstra de un atro mondo,
de unn’atra vitta…
rionda de cocolli
sensa nisciun…
Traduçion italiaña
La giostra
Una giostra che gira senza fermarsi
illuminata da tante luci vive,
una musica allegra, un trotto d’asino
che cammina bendato senza sosta…
La giostra gira, ma i cavalli, le giraffe,
gli struzzi, le carrozzelle
con i bordi d’oro
e i velluti dei sedili consumati
sono vuoti, deserti, non c’è più nessuno…
e l’asinello trotta ancor più svelto
in un cerchio chiuso
senza principio e fine… la giostra corre
gira sempre più,
la musica non può tenerle dietro
e arranca affannando anche lei.
In cielo vibra qualche stella sbiadita
che trema appena appena,
il mare frange sulla spiaggia
e accarezza la sabbia…
Ombre, solo ombre
sulla giostra che gira…
ombre vuote
senza occhi né mani…
si prendono, si lasciano, saltano dalle carrozzelle sui cavalli
al collo delle giraffe,
come un volo di pipistrelli nella notte…
La giostra dei fantasmi gira per sempre,
giostra di un altro mondo,
di un’altra vita…
girotondo dei cuculli
senza nessuno.
Un fiore de giranio
A poexia do Avegno a no manca de abilitæ metrica e de impegno formale e, comme o dixe o F. Toso, de spesso a l’é «de boña impostaçion tematica».
’Nna pianta de giranio in sce un barcon
inte un vaso de tæra scamorou
a l’arve i fiori e pâ ch’a çerche ancon
o sô de stæ, ormai za tramontou.
Into carroggio o sô o no gh’é ciù
ma i fiori rosci, averti verso o çê,
co-i gambi e e feugge verdi ammian lasciù
e pâ che ô veuggian reciammâ in derê…
’Nna vegetta inte un sciallo arrensenia,
a vëgne da-o barcon co’un gòtto in man…
fiore de un tempo antigo, oua appassia,
a bagna o fiore ch’appassiâ doman…
Traduçion italiaña
Un fiore di geranio
Una pianta di geranio su di una finestra
in un vaso di terra sbreccato
apre i fiori e sembra che cerchi ancora
il sole d’estate, ormai già tramontato.
Nel vicolo il sole non c’è più
ma i fiori rossi, aperti verso il cielo,
con i gambi e le foglie verdi guardano lassù
e sembra che vogliano richiamarlo indietro…
Una vecchietta in uno scialle rattrappita,
viene alla finestra con un bicchiere in mano…
fiore di un tempo antico, ora appassito,
bagna il fiore che appassirà domani…