Roberto Della Vedova (1935-2023)

O l’é stæto un di ciù conosciui poeti in zeneise tra i anni ’70 e ’80 do Neuveçento, anche pe avei fondou o gruppo «O nòstro parlâ - O nòstro scrive», assoçiaçion de poeti, in sce l’orma de societæ de poexia in italian in sveuga de quelli anni, ch’a l’anava in gio pe sale de lettua a diffonde a conosciensa da poexia zeneise. O Della Vedova o fava parte da scheua di poeti firpien, ma segondo o F. Toso a seu vea senscibilitæ e inspiaçion ean ben ben despæge da quelle do Firpo, a-o quæ o se reciammava soo che da un ponto de vista formale. E poexie do Della Vedova son spantegæ inte varie pubricaçioin collettive e inta cheuggeita Liguria Antiga (1983) co-a prefaçion de l’avvoxou giornalista e scrittô Vittöio G. Rosci, ch’ o l’aiva scrito: «O Roberto Della Vedova o l’é un poeta; in giornâ, dî che un o l’é un poeta veu dî fâghe unna malaçion; a-a giornâ d’ancheu tutti fan di quaddri, fan de poexie; e son pittue de plastica, poexie de plastica… O Della Vedova o l’é poeta comme quande gh’ea i òmmi de moen; veu dîse i ferræ, i carpentê, i talacchin; veu dîse comme quande gh’ea l’òmmo… E a poexia, quand’a l’é poexia, a l’é quarcösa ch’a no ne ven da l’òmmo, a no ne ven da-i òrti da tæra, e nì da-i fondi do mâ, a ne ven de da-o Pareiso, veu dîse da donde no se sa. Sta poexia do Roberto Della Vedova a fa a Liguria un pittin ciù Liguria; comme dî ch’a sciuscia in sce un feugo che da chì à un pö o s’asmòrta…»

Vernassa

Fasce nasciue
dove meue o çê.
Vegi fiagni d’uga
inta voxe do sô;
che dua e doçe
a regalla sciamme à l’äia
pe fâ tremmâ l’agave
e a çimma di erboi de oive.

Rivea de ponente

Case gianche, reusa e turchinetto
sparpaggiæ pe-a còsta,
pösæ in sce cunni de tæra
nasciui da-o mâ…
e coverti de parme, d’erboi d’oive
e spallee de fiori,
inte unna neutte
quande ancon - i incanteximi -
regallavan perle a-o mondo.

I sò euggi freidi

– Paisan! Ò giaminou pe passâ i Zovi,
veuggio cangiâ a mæ machina
con a tò vacca,
tutti i mæ dinæ
con a tò tæra –
«Pai! Se poëse cangieiva ma…
a mæ casciña a l’é deruâ
e mi… no ghe son ciù.»
– Paisan! Te prego, meuo da-a sæ.
Pòsso dâte un… çento palaçi,
a mæ fabbrica… pe un rappo d’uga
pe un gòtto de læte –
«L’é sccioio solo un costo de reuse
e in scê spiñe gh’é unna gossa de sangue.»
– Paisan! Lascia che m’arrecovie into bòsco.
No ne pòsso de ciù!
Dove gh’ea i bòschi
brilla miggiæ de lummetti açeixi,
o vento o spussa d’arfê,
a neutte a l’é unna lamma arruzzenia.
Un òmmo solo e stanco o picca à unna pòrta;
nisciun peu sentî, a casciña a no gh’é ciù.
Gh’é solo a neutte, co-i sò euggi freidi.

’Nna çittæ

Conosceivo ’nna çittæ
fæta de crii
de verde e de silensio.
Son partio de neutte
e into mæ cheu sentivo un vegio canto.
Da-o barco
ò visto i campanin de gexe
fâse piccin
e e luxe e o çê
abbrassâse adaxo
a-o ciæo de urtime stelle.