Antögno Pescetto (1770-1844)

O l’ea contemporanio do Martin Piaggio, ma tanto che sto chì o s’ea tegnuo o ciù poscibile lontan da-a politica, o Pescetto o l’é anæto apreuvo à tutti i cangiamenti de regime inti seu tempi; tanto che o comensa da zoeno con di sunetti e unna canson scriti in öcaxon de nòsse de di membri da nobiltæ da Pria, con versci de lözo pe-a societæ aristocratica, ma dòppo a Revoluçion do 1797, con a descriçion de çelebraçioin da festa patriòttica, o se presenta comme poeta popolare e sostegnitô da Repubrica Democratica, sensa ascordâ i dovui encòmi à Bonaparte e à l’ambasciou franseise Faipoult. Dòppo l’annescion a-o Regno de Sardegna, in cangio, o Pescetto inte un seu poemma in sciô còlera à Zena o scrivià atri versci in loude do goernou savoiardo. Inte tutte e scituaçioin, a poexia do Pescetto, arcade co-o nomme de Ittinio Riccalbo, a l’arresta sempre pægia, cuâ inta forma, de un levigou stile neoclascico e arcadico con allegorie e erudie çitaçioin mitològiche, e a contunnia in sciâ mæxima linia fiña à l’Euttoçento avansou.

Per re felisissime nòzze dro signor Maggioeu con ra signora Laoretta Chiappe

…
Ma za l’arba slavâ d’ògni corô
mescia lesta in Ponente re carcagne,
ro primmo raggio sparega ro sô
sciù ra zimma dre caze e dre montagne:
spandan re scioî scciuppando un grato odô,
onde son recamæ quelle campagne,
e o Meito e dre vitù tutta a marmaggia
tornan da ri spozoî ch’an misso in gaggia.

D’öfeuggio coronao con faccia franca
ro Meito batte a pòsta da corrê,
ra Fede ghe va aproeuo moæ frusta e stanca,
allegra in andriene de glassê,
l’Innocenza vestia con stòla gianca
con cera d’angeretto vòtta in sê,
ven con Pudô, Imeneo e Temperanza,
dando o brasso a-o Rispetto e à ra Constanza.
…

Memòia da festa patriòttica

A-i tempi de l’occupaçion franseise, à Zena se festezzava i 14 de luggio; o Pescetto o se veste da revoluçionaio e o descrive de boña veña l’invexendo de quelli giorni.

De piffari e tamburi legionari
se sente tutto Zena rebombâ,
e bravi patriòtti in còrpi vari
ògni ciassa, ògni stradda za occupâ:
oeuttoçento de questi volontari
à sòrte destinæ sciù ro ciassâ
da Libertæ, ghe tocca l’ato onô
de brustolîse ben e croste a-o sô.
…
S’ærzan maestozamente ai quattro canti
adòsso à quattro gròssi pedestalli
quattro statue de forma de giganti
ardimentose comme tanti galli,
ogniunna à grossa orchesta ai pê davanti
per a festa do giorno e per i balli,
e chì ra bella Paxe e là a Speranza,
da st’atro lou Giustizia e ra Constanza.
…
Spartio da tutti i atri à drita parte
palco in gianco apparou sta lesto e pronto
onde an zugou tutto l’inzëgno e l’arte
di trei coroî per attressâ l’impronto
de quello procurou che Bonaparte
n’à costituio à tranquillâ ro conto
de tante tirannie de prepotenti
mai convertii per lagrime e per centi.
Per quattro maestose scarinæ
gran macchina se monta e se caminna,
che comme unna forteçça oppù çittæ
sta in mezo architettâ da man divinna:
l’ærboro ghe sta sciù da Libertæ,
chi ten ancon pe un pòco a testa chinna;
ma dindan ghe fa in çimma o berettin,
pòrto de libertæ, nave e coffin.

Il cholera in Genova

…
– Veleno, scì, veleno, mi l’ò visto –
sbraggia fòrte da-i Servi unna donnetta:
– quello sciô là (oh, còrpo d’Antecristo!)
buttâmelo into læte co-a bacchetta – ;
lê, futo in faccia, poveretto e tristo,
o destende ciù lesto un pò a gambetta,
mentre un sciammo de dònne se gh’assia,
ma i sordatti ô salvòn de poliçia.

Dixan che criasse unn’atra dònna à Pré,
chi mangiava unna tassa de menestra,
d’aveise visto sbatte zu un papê
de teuscego, seguo, da unna fenestra,
che un gatto restà secco in sciù doî pê
dòppo che in tæra un pò ghe n’ammenestra:
ma a poliçia n’à mai posciuo trovâ
a dònna, o gatto, a tassa, né o cuggiâ.
Questa voxe per Zena a se spanteiga
che n’é pin ògni casa, ògni carroggio,
neuve giastemme o pòpolo o desteiga
mentre che arreo crescendo va o borboggio,
che o governo, de çerto, avià da breiga
tante ave à reciammâ sciammæ da-o boggio;
ma chi tegnià do pòpolo o furô,
chi fremme e brontoa de cattivo umô?