Conseggio pe-o Luiggi Cornetto (1924-2003)
O Luiggi Cornetto o l’é rappresentativo de unna categoria de poeti che, tra i anni çinquanta e i sciuscianta do Neuve, aivan visciuo a poexia in zeneise comme voxe de unna societæ ch’a s’ammiava in gio, a se dava pe tiâse feua d’inte roviñe da guæra, e a voeiva ammiâ à l’avvegnî, in mezo à mille contradiçioin e difficortæ; poexia soçiale e de protesta, donca, e pe commun lonxi da-a leçion di Firpo, feua che per quarche improvista avertua lirica, che de semme in semme, a se fava sentî. O Cornetto o l’ea stæto, co-o Della Vedova, tra i fondatoî do gruppo «O nòstro parlâ - O nòstro scrive» di anni Ottanta, e za da-o titolo da seu unica cheuggeita de poexie in zeneise stæta pubricâ in vitta, A mæ çittæ (1978), se capisce che a seu a veu ëse unna poexia corale, ch’a l’intende de dâ voxe à unna gente, un pö comme, di mæximi anni, o l’à comensou à fâ o Giannoni; st’urtimo con ciù fonda coltua, ma fòscia con pascion no ciù fòrte. Poexie edite e inedite do Cornetto son stæte cheuggeite do 2007 into volumme Tutte le poesie.
E gh’ò dito
Passavo
ho sentio o franze
’n sciâ faccia
quello sproin fresco de mæn
son montou ’n scî scheuggi
l’è stæto un momento
pòi a sò vixinansa
e quell’euggiâ d’amô
ch’a m’à accompagnou ’nta vitta.
Quarche menuto
sensa dî poule,
cianin me son giou
e gh’ò dito:
– Moæ.
Traduçion italiaña
E le ho detto
Passavo
ho sentito il frangere
sulla faccia
quello spruzzo fresco di marino
sono salito sugli scogli
è stato un momento
poi la sua vicinanza
e quell’occhiata d’amore
che mi ha accompagnato per tutta la vita.
Qualche minuto
senza dir parole,
pianino mi sono girato
e le ho detto:
– Mamma.
Me mancava…
Çercavo
de inandiâ ’nna stöia
me mancava o fî
ògni òtta
m’accorzeivo
de no aveilo.
Coscì
levou quello stissin
de imbastitua
l’ò lasciâ sbatte a-o vento
comme ’nna cösa.
Traduçion italiaña
Mi mancava
Cercavo
di iniziare una storia
mi mancava il filo,
ogni volta
mi accorgevo
di non averlo.
Così
tolto quel poco
di imbastitura
l’ho lasciata sbattere al vento
come una cosa.
Camixe
Camixe
da-o barcon
che m’ammiæ comme fantaximi
de cöse voei parlâme?
Da fadiga de ’n òmmo
do sûo
de ’n batticheu
de ’n sguaro
fæto da un cotello assascin?
Oppure de profummi
de ’nna maccia de vin delicou
de abbrassi
primma che ’nna man tremmante a ve desponte?
Fòscia questo
vorriësci dîme
mentre o vento o ve fa sbatte
e aspëtæ de sciugâ.
Camixe da-o barcon.
Traduçion italiaña
Camicie
Camicie
dalla finestra
che mi guardate come fantasmi
di che cosa volete parlarmi.
Della fatica di un uomo
del sudore
di un batticuore
di uno strappo
fatto da un coltello assassino.
Oppure di profumi
di una macchia di vino delicato
di abbracci
prima che una mano tremante vi sbottoni.
Forse questo
vorreste dirmi
mentre il vento vi fa sbattere
e aspettate di asciugare.
Camicie dalla finestra.
Muxica
A vòtte
voxe de tron
atre
voxetta sottî
rianello queto
che ven zu da-a montagna.
O son di tasti
o pessigâ de còrde
o ton de ’n tambuo
a melodia de ’na voxe:
MUXICA
ch’a te niña
a te scceuppa drento
a te manda in estaxi…
e te pâ de xoâ.
Traduçion italiaña
Musica
A volte
voce di tuono
altre
vocetta sottile
ruscelletto quieto
che viene giù dalla montagna.
Il suono dei tasti
il pizzicare delle corde
il tono di un tamburo
la melodia di una voce:
MUSICA
che ti culla
ti scoppia dentro
ti manda in estasi…
e ti sembra di volare.
Passa o treno
Passa o treno
a neutte
a l’è scua
in sciâ muagia
de corsa
tanti quaddretti lumminosi.
Ti vorriësci ëse
in sce quello treno
oua
no impòrta dove
sensa ’nna paròlla
sparî
à çento à l’oa.
Ma o dovei
i mille impegni
e responsabilitæ
te tëgnan lì
inciödou.
Solo o pensceo
pe un pö
o te lascia
e pòi o magon
de inluxon.
Comme ’nna frustâ.
Traduçion italiaña
Passa il treno
Passa il treno
la notte
è buia
sul muro
di corsa
tanti quadretti luminosi.
Vorresti essere
su quel treno
adesso
non importa dove
senza una parola
sparire
a cento all’ora.
Ma il dovere
i mille impegni
le responsabilità
ti tengono lì
inchiodato.
Solamente il pensiero
per un po’
ti lascia
e poi il rimpianto
dell’illusione.
Come una frustata.