Luiggi Michê Pedevilla (1815–1877)

O l’ea un præve de idee libeale, vexiñe à quelle do Gioberti; ben ben lontan da-e poxiçioin da Gexa de quelli tempi, in ponto politica, o l’avieiva vosciuo pe l’Italia un regime fedealista e democratico ch’o s’assomeggesse à quello da Svissea, donde pe Zena e a Liguria ghe foïse a mascima autonomia. Da-o 1842 a-o 1870, con de pöse e interruçioin into mezo, præ Pedevilla o pubrica O Lunäio do Sciô Tocca, donde in sce l’exempio do Martin Piaggio o commenta i avvegnimenti da çittæ in ton satirico, ma con unna pascion politica «progrescista» che o Piaggio o no conosceiva e o no se saieiva permisso. I primmi tempi do Lunäio, o Tocca o spartisce co-i atri libeali l’invexendo pe-a figua de Pio IX, ma con l’arrentîse do Pontefixe à de poxiçioin reaçionäie, e speançe che a Gexa a pòsse ëse d’aggiutto a-i ideali do Risorgimento s’ammerman. Da tegnî à mente, into Lunäio do Tocca pe-o 1850, o poemmetto E bomboe, donde o Pedevilla o denonçia e violense e i bombezzamenti missi in atto inte l’arvî do 1849 da l’exerçito piemonteise contra a çittæ, quande Zena – apreuvo o desastro de Novæa e ascì co-a poia d’unn’invaxon austriaca – a s’ea inlusa de poei torna ëse unna repubrica e a l’ea insòrta. L’euvia fondamentâ e ciù ambiçiosa do Pedevilla a l’arresta peò A Colombiade (1870), unna rievocaçion de l’impreisa de Colombo, che inte l’intençion de l’autô a l’avieiva dovuo ëse o poemma naçionale zeneise, comme l’Atlantida do Verdaguer a ô l’é pe-a Catalogna; segge pe-a pöca cua lenguistica, segge pe-a convençionalitæ da vixenda, o poemma o no l’é guæi riescio, feua che inte quarche descriçion ciù fito inspiâ, e inte quarche episòdio segondäio ch’o fa da attesto a-e polemiche cae à l’autô; sorvetutto arrestan inta memöia i attacchi contra a monarchia savoiarda e i seu ministri, mascime o Cavour «un ministro sensâ e speculatô / ch’o vende comme röba da mercou / unna çittæ d’Italia à un Impeatô» (à propòxito da çescion de Nissa a-a Fransa de Napolion III) e a fäsa libertæ do Statuto, da quæ s’avvantan.

E bomboe

Ah, comm’a l’é che unna çittæ scì bella
e scì fòrte a l’é tanto desolâ?
Pe quæ delitto o çê tanto o a fragella?
Da-i sò vexin perchè a l’é bombardâ?
Andavan donca inutilmente à tæra
i fòrti de San Zòrzo e Castelletto,
se a n’à posciuo co-e machine da guæra
schivâ con tanto o spaventoso effetto?
Oh, quante orrô ghe regna in mezo à lê,
deh, chi â consòla un pö, chi â compatisce,
chi mai fra i italien, chi fra i foestê
de cianze un pö i sò guai non arrossisce?
Aimè, che veddo invexe l’impostô
fâ de smòrfie co-o Gallo e co-o Britanno,
che d’accòrdio co-o Tèutono e fra lô
sotta Novara an machinou l’inganno!
Liguri, oh quante mai v’à compromisso
l’innato vòstro amô de Libertæ,
che in voî (sarvo i degeneri) à transmisso
o sangue e a tradiçion di vostri poæ!
Amô che n’ha posciuo mai scançellâ
mëzo secolo scorso in servitù,
e o quæ chi n’é corròtto da-o dinâ,
ò da l’orgheuggio no ô perdià mai ciù!
Ma, oh Dio , perchè mai questo torrente
de malanni l’inonda in mòddo tâ?
O sò tòrto in sostansa o l’é veamente
e tanto grave e tanto geneâ?
fòscia o pòpolo tutto aveiva tòrto
che appeña de Novara o l’ha sentio
a fatale catastrofe, o s’é accòrto
da tante preuve ciæe d’ëse tradio?
E ne-a poia e ne-a raggia sopponendo
in casa traditoî, croati a-e pòrte,
o corriva infuriou tutto invexendo,
a-i arme pe rexìstighe da fòrte;
e pe defende quella libertæ
da quæ o Statuto o dava za un assazzo;
ben che ne-i governanti e i governæ
gh’ea stæto in quella fin aloa do frazzo.
O s’armava, dixeivo, prontamente,
fòscia mâ conseggiòu, fòscia impetoso,
fòscia diretto mâ, fòscia imprudente,
no pòpolo rebelle, nì façioso!…
Che, s’ean mescci con lê di vëi rebelli,
quelli ean da çerne, quelli da punîse,
i arme ean da vortâse contra quelli,
no contra tutto un pòpolo infeliçe!…
rebelli ean fòscia i mìliti che stavan
quæxi tutti in cantiña assotterræ
co-a moggê e con i figgi che tremmoavan?
Fòscia i nòbili ch’ean mëzi scentæ?
O l’ean fòscia i maròtti de l’uspiâ,
dove ciù d’unna bomboa a se scciuppava,
ma che i infermi a n’ha vosciuo toccâ,
fòscia discreta ciù de chi â mandava?
O l’ean pù tante figge che d’un brutto
vile attentato vìttime son stæte?
Tante vìdoe redute a-i centi e a-o lutto,
tante dònne pe-a poia malandæte?
Aveivan tòrto tante case forse,
tanti palaçi guasti e sacchezzæ?
Tanti pövei restæ sensa risorse?
Tanti mòbili ricchi scavissæ?
L’aveiva o Muniçipio chi aspëtava
in mezo à l’anscietæ e à l’inaçion
se l’occaxon propiçia a capitava
de fâ unna boña capitolaçion?
L’aveiva fòscia tanti religiosi
che do scceuppo s’armavan invitæ
pe mantegnî inti giorni borrascosi
(ciù che se poeiva) l’òrdine in çittæ?
L’aveiva fòscia finarmente Cristo,
che in quelle ree giornæ a profanaçion
di mistëi adoràbili o l’à visto
da sò morte e da sò resurreçion?
O Çê, tæra, stupî!… s’é per amô
di òmmi sacrificou l’Onnipotente,
e i potenti do secolo pe lô
sacrìfican i òmmi stranamente!
Donca, gran Dio, voî che sei giusto e retto,
voî no capaçe de parçialitæ,
pe chi comanda e pe chi sta soggetto,
ecco, a causa a l’é a vòstra: giudicæ!
Giudicæ voî (se un tâ giudizio ancon
pe l’atro mondo no l’ei reservou)
chi meita do rigô, chi compascion,
chi dev’ëse punio, chi vendicou.