Luiggi Stallo (sec. XIX)

O l’ea de Sampedæña, delegaçion chi gh’à dedicou un caroggio. Mazzinian e garibaldin, membro da Soçietæ Filantròpica Umanitäia, into quæ ambito, do 1854, o l’é stæto tra i promotoî do settô alimentari in favô di operäi, basou in sce l’acquisto de matëie primme (patatte, gran e fæñe, riso, euio, vin, lemi, etc. e carbon ascì), tramite un caiâ accheuggeito tra i soçi, con obbligaçioin de 50 lie l’uña. O l’ea o primmo passo verso e ciù organizzæ cooperative de consummo, ch’avian un gròsso desviluppo dex’anni apreuvo. O Stallo l’ea à favô de unna democraçia popolare basâ in sciô voto universâ, diriti di ciù pövei, educaçion e coltua, progresso soçiale di operäi. Stæto accaxonou de sediçion, pe unna tentativa de sollevo à l’epoca da partensa do Carlo Pisacane, e acciappou da-a poliçia a-i 29 de zugno do 1859, o l’é arriescio à scappâ, ma proçessou in seu assensa (co-o Mazzini e o Antonio Mosto) e condannou à dex’anni de prexon. Tra i carabinê zeneixi o l’à parteçipou de persoña e volontäio a-e guære garibaldiñe. Do 1868 ô trovemmo fondatô e primmo prescidente da «Società M.S. dei Volontari italiani di San Pier d’Arena» e da «Associazione Reduci delle patrie battaglie». O no l’é stæto eletto torna l’anno apreuvo, perché a-i 7 de luggio do 1869 ô trovemmo detegnuo inta çittadella de Lusciandra, e do 1870 à Gaeta. Stæto sciortio d’in prexon, dòppo a spediçion franseise o l’à criticou con fòrsa o Garibaldi, con pubricâ un volumme in Fransa, à Chambery, do 1871, Verità e calunnia in faccia al generale Giuseppe Garibaldi. Reminiscenze di un volontario italiano in Francia e apreuvo à sto fæto chì o l’é stæto allontanou da-e assoçiaçioin e emarginou. Do Stallo se conosce ascì un poemmeto in italian intitolou: L’orfanella di un volontario italiano morto a Mentana il 3 novembre 1867 (Genova, Tipografia Economica, 1877).

A vixon d’un emigrou italian

Sta Vixon, ch’a se inseisce inta sveuga euttoçentesca di lunäi, a contëgne ascì, dòppo o testo poetico, un lunäietto pe-o 1853 e, a-a dreitua, stæti azzonti à man, i prexi de corree tra despæge localitæ do Regno de Sardegna. O lenguaggio deuviou da-o Stallo, con tutte e seu conçescioin à l’italian, a-o zeneise da borghexia, o fa pensâ a-o Pedevilla, ma chì coscì e critiche a-a Gexa catòlica e a-i regnanti son due comme tutto e dan à divedde areo a reixe mazziniaña e massònica do seu autô, co-a fæ inte unna divinitæ ch’a se piggia a-o cheu a causa di patriòtti italien, e a scombatte da-a mæxima parte do pòpolo, comme inte stròfe de l’Inno de Mameli. Pe-a seu scritua elaborâ, i referimenti erudii (tra i seu modelli a-a dreitua Dante, ò o Petrarca de I Trionfi) , a cua formale, o poemmetto o no l’ea de seguo destinou a-o pòpolo, ma o serviva à tiâ da-a parte di mazzinien quella borghexia inlumminâ e fornia de unna çerta instruçion, ch’a foïse in condiçion d’apprexâlo e scompartîne i ideali. L’emigrou do titolo o l’é, ciæamente, un exiliou repubrican che, con l’espediente ciùfito abuxou da vixon, into gio de ottantun sestiñe metricamente perfette, o revedde o passou e o profetizza i avvegnimenti futui, scin à imaginâ i Stati Unii d’Euröpa, e a-a dreitua quelli do Mondo, retti à Repubrica Democratica; unn’atra demostraçion de comme, à quelli tempi, a lengua zeneise a poeiva vegnî à taggio pe trattâ di argomenti elevæ e à spanze propaganda de ògni meña, pe-a seu capaçitæ de arrivâ de lengê à tutti.

Strenna per l’anno 1853 ch’a se vendià à benefiçio de l’emigraçion italiaña rescidente in Zena – Zena Stampaia Dagnin – 1853

I

Quæxi stanco de vive e scoraggio
de poei ciù à longo sopportâ e mæ peñe
da tanti affanni e privaçioin patio
pensando a-a Patria sempre ciù in cadeñe,
emigrou sensa avei chi me confòrte
me compiaxeivo con l’idea da mòrte.

II

Coscì pensamentoso e vagabondo
sciù pe unna stradda solitaria e scua
m’inoltravo, e arrivou de quella in fondo
me s’arviva in presensa unna cianua
çircondâ da di monti e da foreste
leughi adattæ per e mæ idee funeste.

III

L’ea inta l’oa do tramonto quando o sô
con l’urtima sò luxe e ciù ate ponte
de montagne o l’indöa e che in splendô
se vedde tutto açeiso l’orizzonte
che mi, mentre imbruniva dappertutto,
giava pe-i bòschi solitario e mutto.

IV

Finalmente int’un scito cavernoso,
orrido e alpestre, sotto unna gran ròcca,
m’inoltro e dentro un antro spaventoso
me fermo sorve un strato d’erbacòcca,
dove m’assetto derelitto e frusto
non solo da-o cammin ma da-o desgusto.

V

E imprecando d’Italia a-i rei tiranni
sempre ciù me sentivo risoluto
de dâ fin a-i mæ giorni e a-i mæ malanni
con dâme a mòrte, e stranamente futo
dando pe-a Patria un ultimo sospio
primma de moî me rivolzeivo à Dio:

VI

Oh, eterno Poæ, esclamavo, se l’é veo
che s’agge da soffrî pe-a vitta eterna,
ò sofferto abbastansa, e tutte areo,
e infami opprescioin de chi governa
i Popoli d’Italia, ò sopportou
sensa ësime un pesso sgomentou.

VII

Ma a misëia, l’exilio, i patimenti
m’an riduto à l’estrema despeaçion,
no poendo ciù resciste à sti tormenti
son çerto d’ottegnî o vòstro perdon,
se a vitta che m’ei dæto per soffrî
me levo per levâme da patî.

VIII

E quæ colpa l’é stæto in mi punia
se non quella d’avei pe-a Libertæ
combattuo dexidiando Italia unia,
de vedde infin sparî tutte e armæ
di sò nemixi barbari e foestê
da questa tæra favoria da-o çê?

IX

Mi non ò colpe e sento a mæ consciensa
d’ògni delitto e de rimòrsci pua,
né mai contaminavo l’iñnoçensa,
né a-e ricchesse ò mai l’anima vendua,
né ò mai çercou de rovinâ i mæ fræ
tentou da l’egoismo ò da-i dinæ.

X

N’ò mai tradio nisciun, né a santa paxe
de famigge ò di sposi ò disturbou,
à l’onestæ e a-a virtù ò çercou de piaxe,
né me son mai da quelle allontanou;
o mæ pan co-o despiou me son spartio
e ò diviso o sospio co-o sò sospio.

XI

Di scellerati non ò mai temmuo
né a perfidia ò l’infame maldicensa
e con fronte ata e l’animo seguo
de dispressâli ò sempre avuo a paçiensa
e gh’ò rispòsto dignitosamente
comme fa un accusou ch’o l’é iñnoçente.

XII

Ò ammou l’Italia quanto ammâ se peu
cösa ch’a segge inmensamente caa,
ma o fù delitto pe-o paterno cheu
de chi ne rende l’existensa amaa,
de chi sta in tròno e impera sorve noî
co-a violensa, co-a fòrsa, co-o stafî.

XIII

Ò aspëtou invano i furmini do çê
pe vedde colpî l’empio e l’oppressô,
vendicâ l’iñnoçensa e sotto a-i pê
de l’òmmo giusto l’òmmo malfattô
e vedde finalmente in tròno missa
a saviessa e a virtù stabile e fissa.

XIV

Mentre coscì parlavo a-o Paddre Eterno
un improvviso terremòtto sento
se sconquascia a caverna ne l’interno
c’un fracasso ch’o m’impe de spavento,
chi me fa credde de restâ sciaccou
sotto de quelle ròcche e sotterrou.

XV

Da quello fô tremendo sbalordio
privo de sensi cazzo comme mòrto,
ne sò quanto scie stæto stramortio,
sò solo che, sens’ësimene accòrto,
quando son rinvegnuo ne-o tempo stesso
un strano cangiamento o l’ea successo.

XVI

Non ciù sotto unna gròtta me trovavo,
ma trasportou int’unna campagna amena
da dove stupefæto contemplavo
unna variante e deliçiosa scena
de proei de bòschi in scimmetria divisi
comme se foïse stæto a-i Campi Elisi.

XVII

Un bell’angeo chinou da-o Paradiso
me stava lì dappresso à confortâme
c’un sò divino e angelico sorriso
chi m’indicava de non disperâme,
pöi gentilmente o me porzeiva a man
e o me guiddava in sce un inmenso cian.

XVIII

Lì o me fermava e con severo accento
e seguenti paròlle o me dixeiva:
«À sentio con sorpreisa o tò lamento
chi condannâlo giustamente poeiva
perchè do caxo che ti ciammi acerbo
ti ne dovriësci invece andâ superbo;

XIX

Pròde figgio d’Italia, l’avvilîse
o disperâse per l’avversa sòrte
di sacrifiçi fæti o l’é un pentîse,
o l’é un scordâse de tanti atri a mòrte,
de tanti atri da-i re sacrificæ
chi in guæra, chi in prexon, chi foxillæ.

XX

Donque, coraggio e indòmita constansa
ne-o soffrî sempre nobilmente feo,
aggi fede segua, ferma speransa,
ne l’attuaçion de quell’eterno veo,
cioè: a Libertæ che un giorno a governiâ
i Pòpoli, e ne-o mondo a s’incarniâ.

XXI

Intanto quello che oua ti veddiæ
per voentæ arcana de l’Onnipotente
pe contâlo e ripetilo a-i tò fræ
che sòffran in exilio, tëgni à mente:
coscì dixendo i euggi o me toccava,
e unn’atra vòtta tutto se cangiava.

XXII

Me paiva d’ëse introu int’un Camposanto
grande, spaçioso, à l’ombra di çipressi:
sentivo un melodioso e mesto canto
chi sciortiva da-e tombe di òmmi oppressi,
mòrti pe-a Patria e martiri gloriosi
che saan per tutti i secoli famosi.

XXIII

Ecco quanto do canto me regòrdo:
«Oh voî, dixeivan, zoveni viventi
che superstiti sei, quest’arregòrdo
no ve scordæ pe rendive redenti
che per vinçe e atterrâ i vòstri tiranni
beseugna primma prevegnî i seu inganni.

XXIV

Pöi fâ a rivoluçion grande e completa,
sensa lasciâse inludde da meschiñe
concessioin di sovrani, e à quella meta
d’indipendensa vea che s’incammiñe
tutte e vòstre fadighe pe-a Naçion
UÑA E SOLA, ecco a vea rivoluçion.

XXV

Noî emmo travaggiou primma de voî,
ma in tempi ciù ardui e ciù pericolosi
v’emmo averto o cammin primma de moî
e in faccia di tiranni ardimentosi
semmo mòrti lasciandove ne-a stöia
UN MARTIRIO, UNN’IDEA, aggiæne in memöia.

XXVI

Da quello canto me sentivo scòsso
e inebriou da un divin presentimento,
ne-o profondo de l’anima commòsso
da quello mesto e flebile concento,
quando improvvisamento veddo arvîse
e sacre tombe e i mòrti descrovîse.

XXVII

Stavan sciù tutti incoronæ d’öfeuggio
fasciæ int’un lençeu gianco, co’un parmê
ne-a man drita, da l’atra avendo un feuggio
dove gh’ea scrito: GLORIA ETERNA IN ÇÊ.
Mi rispettoso aloa me inzenoggiavo
e quell’ombre diviñe contemplavo.

[…]

O patriòtta o vedde e anime de tutti i martiri do libeo pensceo, à partî da-i sòliti Giordan Brun e Galileo, ma o mette con lô ascì Dante, tegnuo pe nemigo da Gexa e do Papato, e, insemme, Savonareua, Cola da Rienzo, Masaniello, e atri, tutti conscideræ martiri da futua libertæ, e dapeu, comme l’é lògico, tutti i carbonari implicæ inti vari sollevi e stæti fuxillæ. À sta vixon ne vëgne apreuvo unn’atra, quella di tiranni antighi e moderni, che fan gazibba pe eliminâ o libealiximo, e son commandæ da òmmi de gexa, comme o paddre Gusman l’inquixiçionäio, in favô de unna dua represcion, tanto che o paddre Rhotaan, o parla in favô de reforme pe imbroggiâ ciù ben i libeali, con spantegâ a descòrdia e e divixoin into campo avversäio. Stæta passâ sta vixon ascì, o patriòtta o vedde vegnî avanti i òmmi armæ de compagnie, che representan i pòpoli da tæra, ogniduña con unna bandea contrassegnâ da un segno scimbòlico. De fronte a-a bandea ch’a profetizza i Stati Unii d’Euröpa, inte tutti scenta «ògni pascion pe-a tæra sò natia» ch’a saià sostituia da l’amô universale pe l’umanitæ. E chì vëgne da domandâse perché beseugneiva ëse patriòtti, se l’é de za destin che o patriottiximo o se deslengue inte un ciù generico e sperso amô pe-i Stati Unii d’Euröpa, ò pe di ancon ciù lonten Stati Unii do Mondo. I doî personaggi mensunæ verso a fin, che suscitan mai tante speanse de reneuvamento millenaristico inte l’autô, Luigi e Giuseppe, pâ che seggian o Garibaldi e o Luiggi Napolion, che da lì à un pittin o diventiâ Impeatô di franseixi, segondo unna proçedua no guæi democratica, in tradî e aspettative di patriòtti de sa e de là de Arpe; ma se sa che no tutte e «vixoin» dan into segno.

LXXVIII

Fra e tante ch’ea passou e che passava
uña a ghe n’ea ciù grande che gh’ea scrito
A-I STATI UNII D’EURÖPA e a s’acclamava
da tutto o stuolo in numero infinito,
ògni pascion pe-a tæra sò natia
à quella vista in tutti a l’ea sparia.

LXXIX

Portâ da doî grend’òmmi e sostegnua,
i quæ benché viventi an unna fama
za a-i presenti e pòsteri segua,
ne temman ciù chi sempre ne î diffama
pe invidia, pe interesse ò pe capriçio,
do mondo intrego avendo za o giudiçio.

LXXX

Luigi un, l’atro Giuseppe l’é ciammou,
speransa de doe seu son tutti doî,
seu sventuræ che tanto an sopportou
pe levâse e e rexiste a-i oppressoî
che ê tëgnan comme scciave incadenæ
da lô speran salvessa e libertæ.

LXXXI

Mentre coscì incantou, da tutte in fondo
me contemplava unna bandea lontaña
ne-a quæ gh’ea scrito STATI UNII DO MONDO…
un ventixeu sciusciou da tramontaña
o me colpiva a faccia e o m’addesciava
e ne-a realtæ presente me trovava.