Imprende o zeneise

In azzonta à ëse a varietæ a ciù diffusa, o zeneise a l’é ascì quella co-i ciù tanti materiali didattichi. Pe chi s’avvexiña a-o studio do zeneise pe-a primma vòtta, conseggemmo chì dabasso di materiali che trattan de grammatica e lescico.

Libbri conseggiæ

Un libbro completo ma ascì perfetto pe-i prinçipianti, con ben ben d’exempi, o l’é de seguo Il Genovese in tasca. Guida di conversazione, à cua di A. Guasoni e F. Toso, Assimil, 2010.

A grammatica a ciù completa e rigorosa a l’é quella do Prof. F. Toso, Grammatica del genovese: varietà urbana e di koinè, Le Mani e associazione «A Compagna», 1997.

Unna boña introduçion a-a lengua, ma diffiçile d’attrovâ inte libbraie, a l’é ascì Parlo Ciæo. La lingua della Liguria. Grammatica, letteratura, storia, tradizioni, à cua do A. Acquarone, De Ferrari, 2015.

Diçionäi

O Diçionäio digitale italian-zeneise do Conseggio, con exempi areo, declinaçioin, coniugaçioin di verbi, informaçioin in sciâ prononçia e tanto atro.

Unna boña scintexi do lescico italian ciù frequente missa à confronto co-e seu equivalense in zeneise o l’é S. Lusito, Dizionario italiano-genovese, Programma, 2022.

O diçionäio da stacca italian-zeneise e zeneise-italian, con ciù de 12.000 intræ, à cua do Prof. F. Toso, Dizionario genovese, Vallardi, 1998.

Articoli in sciâ grammatica

I membri do Conseggio en apreuvo à mette in linia unna serie de articoli de approfondimento in scî argomenti ciù importanti da grammatica da lengua ligure inta seu varietæ zeneise. L’articolo chì dabasso, in sciâ grafia do zeneise, o l’é à cua do Prof. F. Toso.

• Grafia do zeneise

Lettue conseggiæ

Unna vòtta impreiso e base da lengua, a megio strategia a l’é de bollâse à leze e sentî di contegnui in lengua. Un bon ponto de partensa a l’é a nòstra lista de lettue conseggiæ.

Anâ a-a seçion Lettue