Domenego Garello (sec. XIX)

Tra o 1812 e o 1819, l’attô Domenego Garello o presenta a-o tiatro de Campetto e a-o Falcon unna serie de farse e parodie (i titoli peuan ëse in italian comme in zeneise), che gh’an comme protagonista a mascara do Sciô Regiña, son di titoli comme O Sciô Regiña a-a Mäpaga, O sposaliçio do Sciô Regiña co-a Sciâ Leituga, Le cantatrici di Bargagli e Regina capo dell’orchestra dei gobbi, Il convitato di pietra con Regina servo di Don Giovanni, O Sciô Regiña, mego pe fòrsa, Regiña servitô de doî padroin, Regina atterrito dalle apparizioni, e atre. O Sciô Regiña, avanti d’ëse unna maccetta tiatrale, o l’ea stæto un òmmo in carne e òsse, un gandollo originäio da Rivea de Ponente, çerto Françesco Cavanna, un ch’o se guägnava a vitta de anâ in gio à pe ostaie à fâ rie e gente, che ghe manuavan un gòtto de vin e un tòcco de pan. Do 1792, à quarant’anni, o l’ea mòrto à l’improvvista, ciocco areo, in cazze de pe-e scae d’unn’ostaia e gh’ea fiña stæto quarche sospetto in sce sta seu fin, ch’a paiva pöco ciæa. Ma e gente no se l’aivan ascordou e di attoî, tra i quæ o Garello, aivan continuou à interpretâ o personaggio a-o tiatro, ascì à distansa de anni; o Martin Piaggio, in presentâ o seu primmo Lunäio (1815), o ghe fa dî de coscì:

«…L’é trent’anni che son in menissetti,
eppù me fan parlâ, pe carregâme,
a-o tiatro, inti lunäi, e inti feuggetti.»

Fòscia o mæximo Piaggio o l’aiva conlaborou à sti pessi tiatrali de pöco impegno, mascime con scrive i versci che de soventi concluddan e scingole scene, à transumme o contegnuo; e dapeu o l’à repiggiou lê ascì o personaggio, con modificâlo ancon in scê pagine do seu Lunäio, fin à fâne o protòtipo do zeneise de bon senso e «à l’antiga», figua ch’a reseconda inti anni fin a-o tiatro do Baçigalô, e da sto chì inte quello do Govi. E farse do Garello paivan perdue, fin quande, di anni Settanta do secolo passou, o Aidano Schmuckher o no l’à descoerto inte l’Archivio do Museo do Risorgimento Le gelosie del Signor Regina, con attribuîle a-o Piaggio. Segondo o F. Toso, sto testo chì o l’é in cangio euvia do Garello, cösa pe varie raxoin ciù probabile. Chi scrive ste nòtte o l’à avuo occaxon de asciste (1977) à quella ch’a l’é stæta fòscia l’urtima missa in scena de sta comedia, pe-a regia do Cesare Viazzi, e interpretâ da-o Nanni Raffo e o Franco Paladini, doî bravi attoî, che fòscia in giornâ son stæti in pittin ascordæ.

Le gelosie del Signor Regina, Atto II, Scena 2ª

Chì coscì, presentemmo a scena donde o sciô Regiña o l’incontra (e o se scontra) con l’atra mascara do tiatro zeneise, o Capoâ fanfaron, che chì o se ciamma «Enrico» e o fa mostra d’ëse franseise pe raxoin de intresso, con tutti i equivochi tipichi de sta smersa de tiatro. À sta mainea, a vëgne repropòsta a vëgia comiçitæ do tiatro plurilengue do seiçento, co-e incomprenscioin che nasce tra chi parla doe lengue despæge. Da tegnî à mente che semmo a-i tempi che Zena e a Liguria appartegnivan à l’impëio napoliònico e de sordatti franseixi occupanti, di quæ avei unna çerta poia, se ne saià incontrou de pe coscì, inta vitta vea.

Enrico (che sorte dalla tendina vestito in uniforme), e Regina

Enrico

Quel est donc tout ce tapage?

Regiña

(Ah, meschin de mi! Un atro ascoso in casa… a no n’aveiva assæ do sciô Lindöo de feua!)

Enrico

Parlez donc Monsieur, ce n’est pas la maniére…

Regiña

(Me sento röda da-o venin) E chi Scià è, o sciô Monsù?

Enrico

Je suis un militaire, ne voyez vous pas?

Regiña

E cöse scià à da intré, inti fæti de moà, e de mæ moggê?

Enrico

Je vous rèpete que ce n’est pas la manière… Je suis bien etonnè de votre villaine façon d’agir envers votre femme…

Regiña

Ma Monsù, in casa de moà pòsso faire quello che je veu, pöi a me gh’à tiré per i cavelli!

Enrico

(si accosta seriamente e lo prende per un braccio tirandolo in disparte) Monsieur? Comprenez vous bien le français?

Regiña

Oui, che ô capiscio, e ô sò pöcassæ bin parlé, pourquoi?

Enrico

Attendez. Repondez moi, quel tort vous à fait votre femme?

Regiña

Ma premierement scià me digghe un peu qui etez vous Monsù, che sei in casa de moà, ascoso da-a tendiñ?

Enrico

(risoluto e grave) Je suis un officier français qui vient de la guerre, qu’on a fait l’honneur d’envoyer loger chez vous pour deux ou quatre mois!

Regiña

Molte graçie! Bello regalletto! (Ò capio, o l’é un allögio, e a birba a no me dixeiva ninte). Et bien, a mæ famme a m’à tradio, ghe voeu donné un memorial, e pöi mandâla via de la maison.

Enrico

(con trasporto) Comment? vous quittez votre belle femme?

Regiña

Oui, giusto apponto perché a l’é bella, scì che amenemen ghe mettiö beaucoup!

Enrico

(ironicamente e picchiandogli sopra una spalla) Vous ne la ferez pas, Monsieur, votre femme est incapable de vous trahir. Elle vous aime… (serio) C’est vous qui etes jaloux à tort (picchiandogli forte assai sulla spalla).

Regiña

Ahi! Vous burlez, Monsieur, e comment vous savez tutte queste choses, che vegnî dalla guerre?

Enrico

Je le sais, et je le soutiendrai avec mon epée (toccando la spada).

Regiña

(questa a vâ doî södi, miæ se me capitan tutti di boin). Ma Monsù, ammiæ bien che oscinià è int’un erreur, ghe pòsso fâ vedde e toché co-e moen a veritè de quello che ghe diggo…

Enrico

(risoluto) Je vous repéte, que vostre femme est fidelle, que la connois bien, et que vous étes un villain jaloux, ventre-bleu… Voilà mon epée…

Regiña

(Stæ à vedde che piggio ancon de bòtte) Ma Monsù no che no son gioso. Vintitrei beu! (tira fuori un biglietto) prenez, ammiæ un pittin cette lettre che ghe scrive sò amant spaximé… voyez Lindore…

Enrico

(ironico) Ce n’est pas à elle.

Regiña

Ma voyez Monsù, cöse ghe dixe: «Alla Sig. Rosa Regina»

Enrico

Je connois bien cette lettre, je sais tout, pas de replique, la femme est fidelle, vous ne la meritez pas (in aria di caricaturarlo). Allez Monsieur prendre un peu d’air… sortez… allez vous promener, vous en avez besoin (ridente sardonico) j’ai à dire quelque chose à votre belle Rosine.

Regiña

(Ò capio tutto).

Enrico

Vous reviendrez peut étre bien convaincu de votre tort. Allez-allez donc.

Regiña

(O me manda via de casa mæ! ma chi ghe veu prudensa, mi no me veuggio dâ). E bien donnez moi donque a mæ lettea.

Enrico

Oh! Cette lettre est trop chere à qui elle est ecrite, je la tiens pour la lui donner (ridendo) vous est bien bon.

Regiña

(o me carrega ancon! Andemmo subito da-o sciô Gieumo à piggiâ un pö de paei e savei comme m’ò da regolâ). Za che, Monsù, me mandez via con tanta boña manea, je m’en vais; scià no manquez pas d’amusà à votre piaxei (pe atro sento che ghe patiscio à lasciâ chì a mæ Rosiña; se me â poëse portâ via coscì infedele comme a l’é, tanto a me saiva caa; basta, andiö e torniö subito). Adieu Monsù, Scignoria (che o diao o te pòrte via).

Enrico

(ridente) Adieu mon ami, allez devenir un tres bon mari. Venez, touchez la main (gliela stringe assai forte).

Regiña

(Ahimemì, o me stòcca e die!) (la ritira presto, lo guarda brusco e dice) adieu.

Enrico

Adieu, mon cher parent.

Regiña

(sò paente! Ò capio tutto!) (fra’ denti) Adieu.

Enrico

Adieu, adieu au plaisir Mons. Reginà

Regiña

(parte arrabbiato e mortificato facendo dei lazzi e girandosi addietro) Poscito scciuppâ!